سعودی عرب کی قومی فضائی کمپنی سعودیہ ایئر لائن نے ایک اہم سنگ میل حاصل کرلیا ہے، جس کی برانڈ ویلیو 1.1ارب ڈالرز کی سطح پر پہنچ گئی ہے جو کہ گزشتہ برس کے مقابلے میں 34فیصد زائد ہے۔
اے آر وائی نیوز کی رپورٹ کے مطابق سعودیہ ایئر لائن کی یہ کامیابی عالمی ایوی ایشن انڈسٹری میں جدت اور عمدہ کارکردگی کیلئے اس کے عزم کو نمایاں کرتی ہے۔
ایک سرکردہ اور آزاد برانڈ ویلیو ایشن کنسلٹنسی ادارے ”برانڈ فنانس“ نے اس گروتھ کو 2025 کیلئے عالمی سطح پر ایئر لائنز برانڈز پر اپنی جامع سالانہ رپورٹ میں بھی تسلیم کیا ہے۔
اس عمل میں برانڈ کی ویلیو ایشن کے تعین کیلئے مختلف عوامل پر غور کیا جاتا ہے، جس میں کاروباری کارکردگی، اسٹریٹجک اقدامات اور مسافروں کے تاثرات وغیرہ شامل ہوتے ہیں۔
اس سنگ میل کے حصول میں اہم کامیابیوں میں سعودیہ گروپ کا ایئر بس کے ساتھ 105طیاروں کی خریداری کا تاریخی معاہدہ بھی شامل ہے۔
اس کے علاوہ بی ایل وی ڈی رن وے تھیم پارک کی تعمیر، اسکائی ٹریکس کی جانب سے سال2024کیلئے دنیا کی سب سے بہترین فضائی کمپنی کا اعزاز، پروازوں کی بروقت آمد و رفت کی شاندار شرح اور مسافروں کے شاندار سفری تجربے کیلئے متعدد ایوارڈ نے سعودیہ کی ساکھ اور مقبولیت میں اضافہ کیا ہے۔
مزید پڑھیں : سعودی عرب کی قومی فضائی کمپنی نے اہم سنگ میل عبور کرلیا
سعودیہ گروپ کے ترجمان کا کہنا ہے کہ 1ارب ڈالر کی برانڈ ویلیو کا حصول ہمارے اسٹریٹجک اقدامات اور عمدہ آپریشنل کارکردگی کے ساتھ ساتھ ہمارے مسافروں کے غیر متزلزل اعتماد اور بھروسے کا ثبوت ہے۔
