ریاض: سعودی عرب کے جنوبی علاقے جازان میں پہلے سینیما گھر کا افتتاح کردیا گیا۔
عرب میڈیا رپورٹ کے مطابق سعودی عرب کے شہر جازان میں پہلے سینیما گھر کا افتتاح منگل کے روز کیا گیا جبکہ عوام کے لیے اسے بدھ کے روز سے کھولا گیا۔
رپورٹ کے مطابق جازان کے ڈپٹی گورنر شہزادہ محمد بن عبدالعزیز بن عبدالعزیز نے 4 کروڑ 20 لاکھ ڈالر سے تیار کیے جانے والے سینیما گھر کا افتتاح کیا اور اس سلسلے کو جاری رکھنے کا اعلان کیا۔
میڈیا رپورٹ کے مطابق سینیما میں 10 ہال ہیں جن میں سے دو بچوں کے لیے مختص کیے گئے، ہر ہال میں 80 سے 120 افراد کے بیٹھنے کی گنجائش موجود ہے۔
رپورٹ کے مطابق سینیما گھر کے افتتاح کا مقصد عوام کو اُن کے شہر میں ہی سستی اور اچھی تفریح فراہم کرنا اور اُن کے معیار زندگی کو بہتر بنانا ہے۔
یاد رہے کہ سعودی عرب میں وژن 2030 پر عمل درآمد کیا جارہا ہے جس کے تحت گزشتہ برس شاہ فرمانروا نے خواتین کو گاڑی ڈرائیو کرنے کی اجازت دی اور پھر اُن کے محرم کے بغیر بیرونِ ملک جانے سمیت دیگر پابندیوں کو ختم کیا گیا۔
إفتتاح أول صالة سينما في منطقة جازان جنوب #السعودية pic.twitter.com/9aNUQNkhcs
— العربية السعودية (@AlArabiya_KSA) December 10, 2019
علاوہ ازیں سعودی عرب میں سینیما گھروں کا افتتاح کیا گیا جبکہ اس کے ساتھ ہی موسیقی کی محافل کا انعقاد بھی ہوا اور عوام کو تفریح فراہم کرنے کے لیے ریسلنگ جیسے ایونٹ بھی منعقد کیے گئے۔
