کراچی: نئے کرنسی نوٹوں کے حوالے سےاسٹیٹ بینک آف پاکستان کا اہم بیان آگیا ، جس میں کہا عوام کے کچھ حلقوں نے ایک ڈیزائن میں غلط طور پر ایک خاص مذہب کو نمایاں کرنے کی کوشش کے طور پر بیان کیا۔
تفصیلات کے مطابق نئے کرنسی نوٹوں کی سیریز کے حوالے سے اسٹیٹ بینک آف پاکستان کی وضاحت آگئی، جس میں کہا ہے کہ جنوری میں موضوعاتی ڈیزائن اور آئیڈیاز کے لیے آرٹ مقابلے کے ساتھ نئے بینک نوٹوں کی سیریز کی ڈیزائننگ کا عمل شروع کیا گیا، مقابلے کا مقصد فنکاروں کی حوصلہ افزائی اور بین الاقوامی سطح پر رائج بہترین طریقوں کے مطابق ڈیزائن کی تیاری کے عمل میں عوام کو شامل کرنا تھا۔
اسٹیٹ بینک کا کہنا تھا کہ جمع کرائے گئے ڈیزائنوں کا جائزہ معزز ماہرین پر مشتمل کمیٹی نے لیا اور فاتح انٹریز کا اعلان 5 ستمبر 2024 ءکو کیا گیا:مقابلے کے ان نتائج کو ذرائع ابلاغ اور بعض عوامی حلقوں نے نئے بینک نوٹوں کی سیریز کے ڈیزائنوں کی شارٹ لسٹنگ سے تعبیر کیا۔
مرکزی بینک نے بتایا کہ نتائج کے اعلان کا مقصد محض فنکاروں کی کاوشوں کو سراہنا اور انعامات سے نواز کر ان کی حوصلہ افزائی کرنا تھا۔
اسٹیٹ بینک آف پاکستان نے مزید کہا کہ فاتح قرار پانے والے ڈیزائنوں میں سے ایک میں مذہبی تنوع کی عکاسی کرتے ہوئے ملک میں موجود مختلف مذاہب کو اجاگر کیا گیا، عوام کے کچھ حلقوں نے اسے غلط طور پر ایک خاص مذہب کو نمایاں کرنے کی کوشش کے طور پر بیان کیا، آرٹ کمیٹی نے فاتح ڈیزائن کا انتخاب محض اس کے فنی معیار اور مذہبی تنوع کے موضوع کی بنیاد پر کیا ، اس کا اور کوئی مقصد نہیں۔
Currency Rates in Pakistan Today- پاکستان میں آج ڈالر کی قیمت
مرکزی بینک کا کہنا تھا کہ یہ بات واضح کی جاتی ہے کہ جن ڈیزائنوں کو فاتح قرار دیا گیا وہ بینک نوٹوں کی نئی سیریز کے لیے شارٹ لسٹڈ ڈیزائن نہیں، مجوزہ نئی سیریز کے حتمی ڈیزائن مسابقتی عمل کے ذریعے منتخب کردہ معروف بین الاقوامی کمپنیاں ڈیزائن کر رہی ہیں اور یہ کمپنیاں دسمبر 2024ء تک نئے ڈیزائنز کے لیے اپنی تجاویز پیش کریں گی۔
اسٹیٹ بینک بورڈ کی جانب سے منظور کردہ ڈیزائنز جنوری 2025 ءتک حتمی منظوری کے لیے وفاقی حکومت کو پیش کیے جائیں گے اور وفاقی حکومت کی منظوری کے بعد ہی نئے ڈیزائن کے بینک نوٹوں کی سیریز کی چھپائی کا عمل شروع کیا جائے گا۔
