کراچی : سرکاری حج اسکیم کے لئے درکار ڈالرز کی وزارت حج کو فراہمی شروع کردی گئی، 5کروڑ ڈالرز پہلی قسط کی صورت میں حج ڈائریکٹوریٹ کو موصول ہوگئے۔
تفصیلات کے مطابق سرکاری حج اسکیم کیلئے درکار ڈالرز کی پہلی قسط اسٹیٹ بینک نےجاری کردی، سرکاری حج اسکیم کیلئے حکومت سے 213 ملین ڈالرز مانگے تھے۔
ذرائع وزارت مذہبی امور نے بتایا کہ پہلی قسط کے طور پر 50 ملین ڈالرز سعودی عرب میں پاکستانی وزارت حج کو موصول ہوگئی، وزارت مذہبی امورکو درکار 21کروڑ30 لاکھ ڈالرز 4 اقساط میں دیئے جارہے ہیں۔
ذرائع نے کہا کہ وزارت خزانہ نے4کروڑ ڈالرز کی دوسری قسط بھی جاری کردی گئی ہے جو تین سے چار روز میں پاکستانی حج ڈائریکٹوریٹ سعودیہ کو منتقل ہوجائے گی۔
وزارت مزہبی امور کا کہنا ہے کہ 6 کروڑ ڈالرز کی تیسری قسط 30اپریل جبکہ 6کروڑ 30لاکھ ڈالرز مئی کے تیسرے ہفتے تک درکار ہوں گے۔
ذرائع کے مطابق وزارت خزانہ نے درکار ڈالرز طے شدہ شیڈول کے مطابق جاری کرنے کی یقین دہانی کرائی ہے، یہ رقم ایئر لائنز کو کرائے،رہائش گاہوں،ٹرانسپورٹ اور ٹیکسز کی مد میں ادا کئے جانے ہیں۔
رواں سال سرکاری اسکیم کے تحت مجموعی طور پر 89 ہزار 605 عازمین حج کا کوٹہ مقرر کیا گیا تھا جبکہ کوٹہ سے تقریباً نو ہزار کم درخواستیں موصول ہوئیں، اسپانسر شپ اسکیم کے تحت درخواست گزاروں کی تعداد آٹھ ہزار رہی۔
سرکاری ریگولر اسکیم کے تحت 44ہزار 190 کے کوٹہ پر 28ہزار 679 اضافی درخواستیں آئیں، سرکاری ریگولر اسکیم کے تحت اضافی درخواست گزاروں کو بغیر قرعہ اندازی حج پر بھیجا جارہا ہے، کچھ ڈالرز اسپانسرشپ اسکیم اور باقی حکومت فراہم کر رہی ہے۔
