کراچی: عالمی شہرت یافتہ سماجی کارکن عبدالستار ایدھی مرحوم کی خدمات کے اعتراف میں اسٹیٹ بینک پچاس روپے کا یادگاری سکہ جمعے کو جاری کرے گا۔
اسٹیٹ بینک آف پاکستان کی جانب سے سماجی کارکن کے اعزاز میں جاری کیے گئے پچاس روپے مالیت کا سکہ اکتیس مارچ سے دستیاب ہوگا۔ سکے کی پشت پر پر ایدھی صاحب کی تصویر کا عکس ہے اور اس پر عہد انسانیت عبد الستار ایدھی کے الفاظ درج کیے گئے ہیں۔
اسٹیٹ بینک کی جانب سے سکے کی تصاویر جاری کی گئیں ہیں جن کے سامنے کے رخ پر عبدالستار ایدھی کی تاریخ وفات بھی درج کی گئی ہے۔
یاد رہے معروف سماجی شخصیت عبدالستار ایدھی طویل علالت کے بعد گزشتہ برس کراچی میں انتقال کرگئے تھے، اُن کی خدمات کے اعتراف میں مختلف سڑکوں اور اسٹیڈیمز کو ایدھی صاحب کے نام سے منسوب کیا گیا تھا۔
انٹرنیٹ کی معروف ویب سائٹ گوگل نے بھی عبد الستار ایدھی کو خراج عقیدت پیش کیا تھا جبکہ گزشتہ دنوں اُن کے یومِ پیدائش کے موقع پر لوگوں نے اُن کی کمی کو محسوس کرتے ہوئے ٹوئٹر پر اپنے تاثرات پیش کیے تھے جس کے باعث ایدھی کا ہیش ٹیگ ٹوئٹر پر ٹاپ ٹرینڈ بھی بنا تھا۔
پڑھیں: ’’ وزیراعظم نوازشریف کی عبدالستار ایدھی کی یاد میں خصوصی سکہ جاری کرنے کی ہدایت ‘‘
مزید پڑھیں: ’’ عبدالستار ایدھی کا یوم پیدائش، ٹوئٹر پر ایدھی کا ہیش ٹیگ پہلے نمبرپر ٹرینڈ ‘‘
