کراچی : اسٹیٹ بینک آج نئی مانیٹری پالیسی کا اعلان کرے گا ، شرح سود مسلسل دوسری بار 15 فیصد پر برقرار رہنے کا امکان ہے۔
تفصیلات کے مطابق اسٹیٹ بینک اگلے ڈیڑھ ماہ کیلئے نئی مانیٹری پالیسی کا اعلان آج کرے گا، اس سلسلے میں مانیٹری پالیسی اجلاس گورنر اسٹیٹ بینک جمیل احمد کی صدارت میں ہوگا۔
مانیٹری پالیسی کمیٹی کےاجلاس کےبعدمانیٹری پالیسی کااعلان کیا جائے گا ، اسٹیٹ بینک مانیٹری پالیسی کا اعلان پریس ریلیز کے ذریعے کرے گا۔
ماہرین کا کہنا ہے کہ مانیٹری پالیسی میں اسٹیٹ بینک کی جانب سے موجودہ شرح سود مسلسل دوسری بار پندرہ فیصد پربرقرار رہنے کی توقع ہے۔
ماہرین نے کہا ہے کہ ملک میں رواں سال ترقی کی شرح ایک سے دو فیصد پر رہنے کی توقع ہے جبکہ موجودہ مہنگائی کی شرح ستمبر میں تیئیس اعشار دو فیصد رہی۔
اسٹیٹ بینک کے مطابق رواں سال یہ مہنگائی کی شرح انیس سے بیس فیصد پر رہنے کی توقع ہے۔
