کراچی : ڈاکٹر عاصم کو علاج کیلئے بیرون ملک جانے کی دوسری بار بھی اجازت مل گئی۔
تفصیلات کے مطابق اکٹرعاصم کو علاج کے لئے بیرون ملک جانے کا پروانہ مل گیا، سپریم کورٹ نے ان کانام ای سی ایل سے نکالنے کی درخواست پھرمنظور کرلی۔
جسٹس فائز عیسیٰ نے دوران سماعت ریمارکس میں کہا کہ قانون کامعیار سب کیلئے یکساں کیوں نہیں ہے،سنگین غداری سمیت کئی مقدمات کےملزم باہربیٹھے ہیں، باہر بیٹھ کربہت بڑے بڑے کام ہورہے ہیں۔
عدالت نے مزید کہا کہ وفاق تمام ملزمان کےساتھ یکساں سلوک کیوں نہیں کرتا، کیا بیرون ملک سےملزمان کی واپسی کیلئے اقدامات کیے گئے؟
یاد رہے کہ سپریم کورٹ میں ڈاکٹر عاصم کی ای سی ایل سے نام نکالنے کی درخواست کی سماعت ہوئی،جس میں موقف اختیار کیا گیا کہ ڈاکٹر عاصم علاج کیلئے بیرون ملک جانا ہے لہٰذا نام ای سی ایل سے نکالا جائے۔
خیال رہے کہ سندھ ہائی کورٹ کے حکم کے بعد ڈاکٹر عاصم حسین کا نام ایگزٹ کنٹرول لسٹ ( ای سی ایل) سے نکال دیا گیا تھا جس کے بعد وہ علاج کے سلسلے میں بیرون ملک روانہ ہوگئے تھے اوراکتوبر کی چھ تاریخ کو وطن لوٹ آئے تھے۔
مزید پڑھیں : بھاگنے والوں میں سے نہیں، ڈاکٹر عاصم
ڈاکٹر عاصم نے میڈیا سے گفتگو میں کہا تھا جو لوگ کہتے تھے میں نہیں آؤں گا دیکھ لو میں آگیا ہوں، بے بنیاد مقدمات کا سامنا کیا ہے اور کروں گا، جنہوں نے جھوٹے کیسز کرائے آج خود کیسز کا سامنا کر رہے ہیں۔
انکا کہنا تھا کہ ہم پاکستان سے بھاگنےوالوں میں سے نہیں ہیں، نوازشریف یہ غلط فہمی میں نہ رہے کہ پاکستان اس کا ہے، شریف خاندان پہلے بھی 10سال ملک سے باہر تھا، شریف خاندان اب بھی ملک سے بھاگ سکتا ہے، ن لیگ ملک کو 200سال پیچھے لےجانا چاہتی ہے۔
واضح رہے کہ رواں سال 29 مارچ کو سندھ ہائی کورٹ نے طبی بنیادوں پر ڈاکٹرعاصم حسین کے خلاف 479 ارب روپے کی کرپشن کے 2 مقدمات میں 25،25 لاکھ روپے کے 2 ضمانتی مچلکوں کے عوض ضمانت منظور کی تھی۔