اسلام آباد: سپریم کورٹ نے ملک بھر میں ایک ساتھ انتخابات کی درخواستوں پر مزید سماعت 27 اپریل تک ملتوی کر دی۔
تفصیلات کے مطابق ایک ساتھ انتخابات کی درخواستوں پر سپریم کورٹ میں کیس کی سماعت 27 اپریل تک ملتوی ہو گئی، اٹارنی جنرل اور فاروق نائیک نے چیف جسٹس سے ان کے چیمبر میں ملاقات کر کے مزید وقت طلب کیا تھا۔
ملاقات میں جسٹس اعجازالاحسن بھی موجود تھے، اٹارنی جنرل نے چیف جسٹس کو مذاکرات سے متعلق اب تک کی پیش رفت سے آگاہ کیا۔
سپریم کورٹ میں دوبارہ سماعت سہ پہر چار بجے شروع ہونا تھی، تاہم چیف جسٹس نے اٹارنی جنرل کی مزید وقت کی استدعا منظور کر لی، اور سماعت ایک ہفتے تک متلوی کر دی۔
ایک ہی دن الیکشن سے متعلق درخواستوں پر سپریم کورٹ میں سماعت کے دوران چیف جسٹس عمر عطا بندیال نے ریمارکس دیتے ہوئے کہا کہ 14 مئی کو انتخابات کا فیصلہ واپس نہیں ہوگا، عدالتی فیصلہ واپس لینا مذاق نہیں ہے۔
عمران خان سے بات کر نے کے عدالتی فیصلے کو نہیں مانتے: فضل الرحمان
چیف جسٹس نے کہا گزارش ہے کہ سیاسی قائدین عید کے بعد نہیں آج ہی بیٹھیں، پنجاب میں فصلوں کی کٹائی اور حج کے بعد کی تاریخ رکھ لیں، مذاکرات میں ہٹ دھرمی نہیں ہو سکتی، دوطرفہ لین دین سے مذاکرات کامیاب ہو سکتے ہیں۔
سراج الحق، مسلم لیگ ن اور پیپلز پارٹی نے کوشش کی، بعد میں پی ٹی آئی نے بھی ایک ساتھ انتخابات کی بات کی، توقع ہے کہ مولانا فضل الرحمان بھی لچک دکھائیں گے۔
