اسلام آباد : سپریم کورٹ نے چیئرمین پی ٹی آئی کو عدالت میں پیش ہونے کاموقع فراہم کردیا ، عدالت کا کہنا ہے کہ نیب ترامیم کیس میں اگر پی ٹی آئی چیئرمین پیش ہونا چاہئیں تو جیل سپرنٹنڈنٹ انتظامات کریں۔
تفصیلات کے مطابق سپریم کورٹ نے نیب ترامیم کیس کا تحریری حکمنامہ جاری کردیا ، 31 اکتوبر کی سماعت کا حکمنامہ جاری کیا گیا، چیئرمین پی ٹی آئی نیب ترامیم کیس میں مرکزی درخواست گزار ہیں۔
سپریم کورٹ کے تحریری حکمنامے میں کہا گیا ہے کہ عدالت تمام فریقین کو نوٹسز جاری کرتی ہے، عدالتی حکم کی نقل اڈیالہ جیل میں قید چیئر مین پی ٹی آئی کو پہنچائی جائے۔
عدالت کا کہنا تھا کہ اگر پی ٹی آئی چیئرمین پیش ہونا چاہئیں تو جیل سپرنٹنڈنٹ انتظامات کریں ، حنیب ترامیم فیصلےکےخلاف اپیلیوں کی سماعت پریکٹس اینڈپروسیجرکےتفصیلی فیصلےسےمشروط ہے۔
سپریم کورٹ نے اٹارنی جنرل اور تمام صوبائی ایڈوکیٹ جنرلز کو نوٹس جاری کرتے ہوئے کہا کہ چیئرمین پی ٹی آئی کو نوٹس جیل سپرنٹنڈنٹ کے ذریعے بھیجا جائے گا۔
یاد رہے سپریم کورٹ میں نیب ترامیم کیس کی چیف جسٹس قاضی فائز عیسیٰ کی سربراہی میں 5 رکنی لارجر بنچ نے سماعت کی تھی۔
