کراچی: سپریم کورٹ کراچی رجسٹری نے شہر میں لگے بل بورڈز اور ہورڈنگ 3 دن میں ہٹانے کا حکم دے دیا۔
تفصیلات کے مطابق سپریم کورٹ کراچی رجسٹری میں بل بورڈز اور ہورڈنگز سے متعلق کیس کی سماعت ہوئی۔
سماعت کے دوران سندھ اسمبلی اور ہائیکورٹ کے اطراف کی شاہراہوں اور شہر میں بچھے بل بورڈز کے جال پر عدالت برہم ہوگئی۔
جسٹس قاضی عیسیٰ نے ریمارکس دیے کہ سندھ اسمبلی اور ہائیکورٹ کے اطراف میں شاہراہوں پر بل بورڈز عدالتی حکم کی خلاف ورزی ہے۔ جسٹس امیر ہانی مسلم نے کہا کہ گزشتہ عدالتی حکم پر عمل در آمد نہیں ہوا۔
عدالت نے بل بورڈز نہ ہٹانے پر برہمی کا اظہار کرتے ہوئے 3 دن میں شہر سے تمام بل بورڈز ہٹا کر رپورٹ جمع کروانے کا حکم دیا۔
واضح رہے کہ گزشتہ برس بھی عدالت نے کراچی میں نئے بل بورڈز اور ہورڈنگز لگانے پر پابندی عائد کردی تھی جبکہ گھروں کی چھتوں اورعمارتوں پر لٹکے بورڈز ہٹانے کا بھی حکم دیا تھا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں