اسلامآباد : چیف جسٹس پاکستان قاضی فائزعیسیٰ کی سربراہی میں فل کورٹ اجلاس میں عدالتی کارروائی براہ راست دکھانے کی اجازت دے دی، سرکاری ٹی وی نے انتظامات مکمل کرلئے ہیں۔
تفصیلات کے مطابق چیف جسٹس پاکستان قاضی فائزعیسیٰ کی سربراہی میں فل کورٹ اجلاس ہوا ، فل کورٹ اجلاس نےعدالتی کارروائی براہ راست دکھانے کی اجازت دے دی۔
سپریم کورٹ پریکٹس اینڈپروسیجر ایکٹ کیس کی سماعت سرکاری ٹی وی براہ راست دکھائے گا، چیف جسٹس کی فیملی بھی پہلی سماعت دیکھنے کیلئے مہمانوں کی گیلری میں پہنچ گئی ہے۔
عدالتی کارروائی براہ راست نشرکرنے کیلئے سرکاری ٹی وی نے انتظامات مکمل کرلیے ہیں ، سرکاری ٹی وی کے کیمرے کمرہ عدالت پہنچا دیئے گئے۔
خیال رہے سپریم کورٹ پریکٹس اینڈ پروسیجر ایکٹ کیس کی سماعت آج ہوگی ، چیف جسٹس قاضی فائزعیسٰی کی سربراہی میں فل کورٹ سماعت کرے گا، فل کورٹ میں سپریم کورٹ کے تمام 15 ججز شامل ہیں۔
یاد رہے سابق چیف جسٹس عمرعطابندیال کی سربراہی میں آٹھ رکنی لارجربینچ نے پریکٹس اینڈ پروسیجر کیس میں حکم امتناع دیا تھا۔
جسٹس قاضی فائزعیسیٰ نے کئی ماہ سے یہ مؤقف اختیار کر رکھا تھا کہ جب تک پریکٹس اینڈپروسیجرایکٹ کا فیصلہ نہیں ہوتا وہ کسی بینچ کا حصہ نہیں بنیں گے۔
انہوں نے اس بات کا اظہار خصوصی عدالتوں کے قیام سے متعلق کیس کے بینچ سے علیحدہ ہوتے وقت بھی کیا تھا۔
