اسلام آباد: سپریم کورٹ نے کراچی میں ہیوی ٹریفک پر پابندی کا سندھ ہائیکورٹ کا فیصلہ معطل کردیا۔ عدالت نے حکم کو بنیادی حقوق کی خلاف ورزی قرار دیا۔
تفصیلات کے مطابق کراچی میں ہیوی ٹریفک کے مسئلے پر عدالت عظمیٰ نے فیصلہ سنا دیا۔ سپریم کورٹ نے کراچی میں ہیوی ٹریفک پر پابندی کا سندھ ہائیکورٹ کا فیصلہ معطل کردیا۔
چیف جسٹس جسٹس ثاقب نثار کی سربراہی میں قائم 3 رکنی بنچ نے سندھ ہائیکورٹ کے فیصلے کو 17 اگست سنہ 2008 کے فیصلے کی خلاف ورزی قرار دیا۔
مزید پڑھیں: اہم شاہراہوں پر ہیوی ٹریفک انسانی جانوں کے لیے خطرہ
دوران سماعت چیف جسٹس نے ریمارکس دیتے ہوئے کہا کہ سندھ ہائی کورٹ کے حکم سے کاروباری نظام جام ہوگیا۔ نقل و حرکت پر پابندی بنیادی حقوق کی خلاف ورزی ہے۔
سندھ ہائی کورٹ کے فیصلے کے خلاف کراچی پورٹ ٹرسٹ، سندھ حکومت اور ٹرانسپورٹر تنظیموں نے درخواستیں دائر کر رکھی تھیں۔
سپریم کورٹ نے معاملے کے حوالے سے فریقین کو نوٹس بھی جاری کردیے۔ بعد ازاں سماعت غیر معینہ مدت تک کے لیے ملتوی کردی گئی۔
یاد رہے کہ سندھ ہائیکورٹ نے 31 مارچ کو کراچی میں ہیوی ٹریفک کے داخلے پر پابندی عائد کردی تھی۔
سندھ ہائیکورٹ نے ریمارکس دیے تھے کہ ہیوی ٹریفک کے ذریعے دہشت گردی پھیلائی جارہی ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔