کراچی : وزیر تعلیم سندھ سعید غنی نے کہا ہے کہ سندھ میں تعلیمی ادارے 8 اگست تک مکمل بند رہیں گے، تاہم مقررہ تاریخ کے بعد صورتحال کے پیش نظر نئے لائحہ عمل کا اعلان بعد میں کیا جائے گا۔
کراچی میں صحافیوں سے گفتگو کرتے ہوئے سعید غنی نے کہا کہ صورتحال کی بہتری پر انٹر سال دوئم کے بقیہ امتحانات مکمل ہوں گے جبکہ صوبہ بھر میں تعلیمی ادارے اعلان کے مطابق 8 اگست تک مکمل بند رہیں گے۔
سعید غنی کا کہنا تھا کہ8اگست کے بعد صورتحال کا ازسر نو جائزہ لیا جائے گا، سندھ بالخصوص کراچی میں کورونا وائرس کی موجودہ صورتحال تسلی بخش نہیں ہے۔
انہوں نے کہا کہ صورتحال کی بہتری پر انٹر سال دوئم کے بقیہ امتحانات مکمل ہوں گے، کراچی اور حیدرآباد میں کورونا مریضوں کی تعداد بہت زیادہ ہے اس لیے تعلیمی ادارے اس وقت کھولنے کی پوزیشن میں نہیں ہیں۔
وزیر تعلیم سندھ نے مزید کہا کہ8اگست کو کورونا ٹاسک فورس کمیٹی کا اجلاس ہوگا، اجلاس میں اس وقت کی صورتحال کو دیکھتے ہوئے آئندہ کا لائحہ عمل طے کریں گے۔
