لاہور :عدالت نے نجی اسکولوں کی جانب فیسوں میں اضافے کے خلاف درخواست پر نوٹس جاری کرتے ہوئے فریقین سے جواب طلب کرلیا۔
تفصیلات کے مطابق لاہور ہائیکورٹ نے پرائیویٹ اسکولوں کی فیسوں میں اضافے کے خلاف درخواست پر پنجاب حکومت سمیت فریقین سے جواب طلب کرلیا۔
مذککورہ کیس کی سماعت جسٹس اعجاز الاحسن نے کی۔ درخواست گزار بیرسٹر ظفراللہ کی جانب سے عدالت کو بتایا گیا کہ آئین کے مطابق پانچ سے سولہ سال تک کے بچوں کو مفت تعلیم فراہم کرنا ریاست کی ذمہ داری ہے۔
تاہم حکومت اس ذمہ داری کو پوار کرنے ناکام ہے، جس کی وجہ سے عوام مجبوراً نجی تعلیمی اداروں کا رخ کرتے ہیں، مگر پرائیویٹ اسکولوں نے اپنی اجارہ داری قائم کررکھی ہے۔
آئے روز فیسوں میں من مانا اضافہ کردیا جاتا ہے جو غیر قانونی ہے کیوں کہ مسابقتی کمیشن کی اجازت کے بغیر فیسوں میں اضافہ نہیں کیا جاسکتا۔
لہذا عدالت نجی اسکولوں کی جانب سے فیسوں میں اضافے کو کالعدم قرار دے اور جو اسکولز اس پر عمل نہ کریں ان کے خلاف کارروائی کی جائے، عدالت نے نوٹس جاری کرتے ہوئے دوہفتوں میں پنجاب حکومت سمیت فریقین سے جواب طلب کرلیا۔
