اسلام آباد : تعلیمی اداروں میں اگلے ہفتے 3 دن کی تعطیل کا اعلان کردیا گیا، 14 سے 16 اکتوبر تک بند رہیں گے۔
تفصیلات کے مطابق راولپنڈی اور اسلام آباد کے نجی تعلیمی اداروں میں 14 سے 16 اکتوبر تعطیل کا اعلان کردیا گیا۔
آل پاکستان پرائیویٹ اسکولز کالجز ایسوسی ایشن نے کہا کہ ایس سی او اجلاس کے پیش نظر تعلیمی ادارے بند رہیں گے، اجلاس میں آنے والوں کوخوش آمدید کہتے ہیں۔
یاد رہے وفاقی حکومت نے 14، 15 اور 16 اکتوبر کو جڑواں شہروں میں عام تعطیل کا اعلان کیا ہے۔
واضح رہے کہ شنگھائی تعاون تنظیم کا سربراہی اجلاس 15 اور 16 اکتوبر کو اسلام آباد میں ہوگا۔ جس میں کئی ممالک کے سربراہان اور نمائندے شریک ہوں گے۔
ایس سی او سمٹ کے لیے آرٹیکل 245 کے تحت اسلام آباد میں فوج بھی تعینات کی گئی ہے جو 17 اکتوبر تک تعیناتی رہے گی۔
بھارتی وزیرخارجہ جے شنکر بھی ایس سی اوسمٹ میں شرکت کیلئے پاکستان آرہے ہیں، وہ15 ،16 اکتوبر کو سمٹ میں شرکت کریں گے، جے شنکر کا پاکستان کا یہ پہلا دورہ ہوگا۔
