کراچی: کراچی پولیس کے اسپیشل انویسٹی گیشن یونٹ (ایس آئی یو) نے نجی اسکول کے پرنسپل اور حساس ادارے کے سابق افسر میجرمشتاق کے قتل میں ملوث تین مبینہ ملزمان کو گرفتار کرلیا۔
ایس آئی یو لیس کے مطابق نجی اسکول کے پرنسپل اورحساس ادارےکےسابق افسر میجرمشتاق کو رواں سال جنوری کی 18 تاریخ کو قیوم آبادندی کےقریب فائرنگ کر کے قتل کیا گیا تھا۔
پولیس نے واقعے کا مقدمہ کورنگی انڈسٹریل ایریا میں درج کر کے قتل کیس کی تحقیقات کا آغاز کیا۔
مزید پڑھیں: کراچی: قیوم آباد کے قریب فائرنگ، حساس ادارے کا ریٹائرڈ افسر جاں بحق
چھ ماہ کی تحقیقات کے بعد پولیس نے قتل کیس کا معمہ حل کرتے ہوئے قتل میں ملوث تین ملزمان کو کورنگی کے علاقے گودام چورنگی اور انڈسٹریل ایریا سے گرفتار کیا، ملزمان نے اپنے جرم کا اعتراف بھی کرلیا۔
ملزمان نے پولیس کو بتایا کہ قتل کے بعدگھر پہنچ کر ٹی وی کے ذریعے معلوم ہوا کہ جسےمارا وہ اسکول پرنسپل اور حساس ادارے کا سابق افسرتھا۔ پولیس کے مطابق ملزمان نے شہر کے مختلف علاقوں میں جرائم کی وارداتیں کرنے کا اعتراف کیا۔
ایس ایس پی کورنگی کے مطابق ملزمان کی نشاندہی پرقتل کی واردات میں استعمال ہونے والا اسلحہ بھی برآمد کرلیا گیا۔
