فیصل آباد : اسکول کے طلباء بھی منشیات استعمال کرنے لگے، فیصل آباد کے سرکاری اسکولوں میں منشیات فروشی اور اس کا استعمال زرو پکڑ گیا،6 سال میں 272 بچے منشیات کے استعمال میں ملوث پائے گئے۔
تفصیلات کے مطابق فیصل آباد پولیس نے اپنی رپورٹ میں انکشاف کیا ہے کہ سرکاری اسکولوں کے طلباء میں منشیات کا استعمال بڑھتا جارہا ہے، اسپیشل برانچ کی رپورٹ میں کہا گیا ہے کہ6 سال میں 272 بچے منشیات کے استعمال میں ملوث پائے گئے۔
رپورٹ کے بعد محکمہ تعلیم حرکت میں آگیا، اس سلسلے میں محکمہ تعلیم نے پنجاب کے تمام اسکولوں میں طلبہ کا ہیلتھ پروفائل مرتب کرنے کا فیصلہ کیا ہے۔
سی ای اوز کو ہدایات جاری کی گئی ہیں کہ اسکولوں کے دوروں کا شیڈول طے کیا جائے، دوروں کے دوران طلباء کی عادات، تعلیمی قابلیت، ذہانت اور مشغلوں کا جائزہ لے ان کی سرگرمیاں چیک کی جائیں۔
مزید پڑھیں: پشاورمیں طلباء کومنشیات فراہم کرنے والا کالج پروفیسرگرفتار
ذرائع محکمہ تعلیم کے مطابق سی ای اوز کو ہدایت دی گئی ہے کہ یہ بھی چیک کیا جائے کہ طلبا ہتھیار تو پاس نہیں رکھتے یا سگریٹ نوشی کے عادی تو نہیں، محکمہ تعلیم نے سی ای اوز کو طلبہ کا ہیلتھ پروفائل مکمل کرکے رپورٹ31 مارچ تک دینے کی ہدایت کی ہے۔
