لاہور : تعلیمی اداروں میں موسم گرما کی تعطیلات کا اعلان کردیا گیا، تعطیلات کب سے شروع ہوں گی؟۔
تفصیلات کے مطابق محکمہ تعلیم نے اسکولوں میں موسم گرما کی تعطیلات کا اعلان کردیا ہے۔
محکمہ تعلیم پنجاب کی جانب سے جاری کیے گئے اعلامیے میں کہا گیا ہے کہ اسکولوں میں موسم گرما کی چھٹیاں یکم جون سے شروع ہوں گی۔
سیکرٹری اسکول ایجوکیشن خالد نذیر وٹو نے اشارہ دیا کہ اگر درجہ حرارت میں اضافہ جاری رہتا ہے تو شیڈول پر نظر ثانی کی جا سکتی ہے
انہوں نے واضح کیا کہ درجہ حرارت میں اگر غیر معمولی اضافہ ہوا تو ممکن ہے چھٹیاں ایک ہفتہ پہلے ہی دے دی جائیں، یہ فیصلہ والدین، طلبہ اور اساتذہ کی صحت کو مدنظر رکھتے ہوئے کیا گیا ہے، کیونکہ شدید گرمی بچوں کی تعلیمی سرگرمیوں کو متاثر کر سکتی ہے۔
واضح رہے کہ عالمی سطح پر موسمیاتی تبدیلیوں کا اثر ہر جگہ محسوس کر رہا ہے اور پاکستان بھی ان خطرات سے محفوظ نہیں۔
گلوبل وارمنگ نے نہ صرف موسم کے معمولات کو درہم برہم کیا ہے بلکہ قدرتی آفات میں بھی اضافہ دیکھنے میں آ رہا ہے، تحقیقات کے مطابق پاکستان دنیا کے ان ممالک میں شامل ہے، جہاں موسمیاتی تبدیلیوں کے اثرات سب سے زیادہ تباہ کن ہو سکتے ہیں۔
ماہرین نے خبردار کیا ہے کہ گرمی کی شدت میں سال بہ سال اضافہ ہو رہا ہے اور اس کے اثرات تعلیم، صحت اور معیشت پر بھی پڑ رہے ہیں۔
پاکستان میں آج ڈالر اور دیگر کرنسیوں کی قیمت
حکومت نے اسکولوں اور والدین پر زور دیا ہے کہ وہ اپ ڈیٹس کی نگرانی کریں، کیونکہ چھٹیوں کے شیڈول میں کسی بھی تبدیلی کے بارے میں موسم کی تبدیلی کے لحاظ سے فوری طور پر آگاہ کیا جائے گا۔
