سینٹ جین ڈی لوز : فرانس کے جنوب مغربی علاقے میں قائم ایک اسکول میں طالب علم نے اپنی ٹیچر کو چاقو کے پے در پے وار کر کے موت کی نیند سلا دیا۔
مذکورہ واقعہ جنوب مغربی فرانس میں سینٹ جین ڈی لوز کے قصبے کے رومن کیتھولک ہائی اسکول میں پیش آیا، ملزم کا کہنا تھا کہ اسے کہیں سے آواز آئی کہ اسے قتل کردو۔
غیرملکی خبر رساں ادارے کی رپورٹ کے مطابق گزشتہ روز ایک 16 سالہ طالب علم نے دوران لیکچر اپنی 50 سالہ ٹیچر کو کلاس میں پڑھانے کے دوارن چاقو مار کر ہلاک کر دیا۔
مقامی پراسیکیوٹر نے میڈیا کو بتایا کہ زخمی ٹیچر کو جائے وقوعہ پر طبی امداد فراہم کی گئی لیکن وہ زخموں کی تاب نہ لاتے ہوئے چل بسی، پراسیکیوٹر نے بتایا کہ طالب علم کو گرفتار کرلیا گیا ہے۔
ان کا کہنا تھا کہ واقعے کی مزید تفتیش کی جارہی ہے، انہیں شبہ ہے کہ نوجوان نے پہلے سے اپنے حملے کی منصوبہ بندی کر رکھی تھی۔
