پنجاب کے شہر چکوال اور تلہ گنگ میں اسکول ٹرانسپورٹ کے لیے فٹنس سرٹیفکیٹ لازمی قرار دیا گیا ہے۔
اے آر وائی نیوز کے مطابق ڈی سی چکوال قرۃ العین ملک کی زیر صدارت اہم اجلاس ہوا جس میں سی ای او ایجوکیشن، ٹریفک حکام، اسکولز ایسوسی ایشنز نے شرکت کی۔
اجلاس میں تمام اسکولز جانے والے رکشوں، وینز ڈرائیورز کے لائسنس یقینی بنانے کی ہدایت کی گئی اور فیصلہ کیا گیا کہ ٹرانسپورٹ اتھارٹی کی جانب سے فٹنس سرٹیفکیٹ بھی یقینی بنائے جائیں۔
ڈی سی چکوال نے کہا کہ اسکول، چوکیدار بچوں کے بحفاظت داخلے اور اخراج کی نگرانی کریں گے۔
قرۃ العین ملک نے کہا کہ والدین اس بات کو یقینی بنائیں کہ ان کے بچوں کا سفر محفوظ ہو، ایس او پیز کے نفاذ میں کسی قسم کی کوتاہی برداشت نہیں کی جائے گی۔
واضح رہے کہ ملک کے مختلف شہروں میں اسکول وینز میں سلنڈر پھٹنے کے واقعات پیش آچکے ہیں۔
اس سے قبل مظفر گڑھ میں اسکول وین میں سلنڈر دھماکا ہوا تھا جس کے نتیجے میں 2 بچے زندہ جل گئے تھے جبکہ 10 زخمی ہوگئے تھے۔
مظفرگڑھ میں تھانہ چوک قریشی کے علاقے قصبہ گجرات کے نزدیک نجی اسکول کی وین میں بچے اور ٹیچرز سوار ہوئیں تو وین میں سی این جی سلنڈر لیک ہو رہا تھا، ڈرائیور نے وین کا دروازہ بند کیا تو سلنڈر دھماکے سے پھٹ گیا اور وین میں آگ لگ گئی تھی۔
