کراچی: انٹر کے سالانہ امتحانات 2024 کے متنازع نتائج کے سبب طلبہ اسکروٹنی فیس ختم کر دی گئی۔
وزیر اعلیٰ سندھ مراد علی شاہ کی خصوصی ہدایات کے بعد چیئرمین اعلیٰ تعلیمی بورڈ کراچی ڈاکٹر سید شرف علی شاہ نے پرچوں کی اسکروٹنی فیس ختم کرنے کا فیصلہ کیا۔
انٹرمیڈیٹ حصہ اوّل کے سالانہ امتحانات برائے 2024 کے سائنس پری میڈیکل، پری انجینئرنگ، سائنس جنرل، کامرس پرائیویٹ، آرٹس پرائیویٹ اور ہوم اکنامکس گروپس کے نتائج سے غیر مطمئن طلبہ کے لیے پرچوں کی اسکروٹنی فیس ختم کرنے کا اعلان کیا گیا ہے۔
چیئرمین انٹر بورڈ کراچی کی ہدایت پر طلبہ کو سہولت فراہم کرنے کے لیے انٹر بورڈ کی انکوائری پر طلبہ کے لیے، جب کہ سہولت مرکز پر طالبات کے لیے خصوصی کاؤنٹرز قائم کر دیے گئے ہیں، تاکہ طلبہ کو اسکروٹنی فارم جمع کروانے میں کسی مشکل کا سامنا نہ کرنا پڑے۔
چیئرمین تعلیمی بورڈ نے اسکروٹنی 30 دن میں مکمل کرنے کے لیے بھی ناظم امتحانات کو ہدایات جاری کر دی ہیں، طلبہ اسکروٹنی فارم انٹر بورڈ کی آفیشل ویب سائٹ www.biek.edu.pk سے ڈاؤن لوڈ کر سکتے ہیں۔
چیئرمین کی ہدایت پر انٹرمیڈیٹ حصہ اوّل کے سالانہ امتحانات برائے 2024 کے نتائج پر طلبہ کی شکایات کے ازالے کے لیے پہلے ہی سینئر اساتذہ پر مشتمل انکوائری کمیٹی تشکیل دی جا چکی ہے۔
