اسلام آباد: عام انتخابات کے لیے امیدواروں کے کاغذات کی جانچ پڑتال جاری ہے، نادہند گان کی تعداد 2300 سے تجاوز کرگئی۔
تفصیلات کے مطابق کاغذاتِ نامزدگی کی اسکروٹنی کرتے ہوئے ایف آئی اے نے دہری شہریت کے 88 کیسز کی تفتیش کی، تفتیش کی تفصیلات الیکشن کمیشن کو فراہم کردی گئی۔
ذرائع الیکشن کمیشن کا کہنا ہے کہ قومی اسمبلی کے 49 امیدوار دہری شہریت کے حامل ہیں، جب کہ پنجاب اسمبلی کے 53 امیدوار دہری شہریت کے حامل نکلے۔
ذرائع کے مطابق سندھ اسمبلی کے 11 اور خیبر پختونخوا اسمبلی کے آٹھ امیدوار دہری شہریت کے حامل ہیں، مراد علی شاہ کے پاس کینیڈا کی شہریت نکلی۔
پاکستان تحریک انصاف کے امیدوار بھی پیچھے نہیں، فیصل واوڈا امریکی شہری نکلے، ذرائع الیکشن کمیشن کے مطابق گلفام سواتی کے پاس بھی امریکا کی شہریت ہے۔
فوزیہ قصوری کے پاس کینیڈا کی شہریت ہے، جب کہ احمد یار حراج کے پاس بھی کینیڈا کی شہریت ہے۔ دوسری طرف این اے 18 سے کاغذات جمع کرانے والے محمد طارق برطانوی شہری نکلے۔
الیکشن کمیشن کی آر اوز کو عید پر بھی کاغذات نامزدگی کی جانچ پڑتال جاری رکھنے کی ہدایت
ذرائع الیکشن کمیشن کے مطابق این اے 53 کی امیدوار فرحانہ قمر برطانوی شہری ہیں، جب کہ نادر لغاری کے پاس امریکا کی شہریت ہے۔
ذرائع کا کہنا ہے کہ این اے 19 سے طفیل محمد بیلجیئم کے شہری ہیں جب کہ بلوچستان اسمبلی کی نشست کے امیدوارعاصم علی شاہ بھی دہری شہریت کے حامل ہیں۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
