کراچی : ہاکس بے کے ساحل پر گزشتہ روز ڈوبنے والے ایک ہی خاندان کے گیارہ افراد کو محمد شاہ قبرستان میں سپرد خاک کردیا گیا، نمازجنازہ میں شہریوں کی بڑی تعداد نے شرکت کی۔
تفصیلات کے مطابق کراچی کے ساحل سمندر ہاکس بے پر بے رحم موجوں کی نذر ہونے والے گیارہ افراد آہوں سسکیوں میں سپرد خاک کردیئے گئے، مرحومین کی نمازجنازہ نارتھ کراچی میں ادا کی گئی۔
نماز جنازہ میں مئیر کراچی وسیم اختر کے علاوہ عارف علوی، حافظ نعیم سمیت سیاسی رہنماؤں اور شہریوں کی بڑی تعداد شریک ہوئی۔
ڈوب کر جاں بحق ہونے والوں میں وہاج ،عمیر ،علی ،سعود ،طٰحہٰ، عاطف، حمزہ، عباد، علی اور فائزہ شامل تھے، مرنے والوں میں تین سگے بھائی تھے۔
مزید پڑھیں: کراچی ہاکس بے پر 12 افراد ڈوب کر جاں بحق
یاد رہے کہ ہفتے کی شام ہاکس بے کے ساحل پر پکنک منانے والے افراد ایک ڈوبتے ہوئے بچے کو بچانے کیلئے ایک ایک کرکے سمندر کی نذر ہوتے چلے گئے۔
اطلاع ملتے ہی ایدھی کے رضاکار اور غوطہ خور پہنچے لیکن اس وقت تک بہت تاخیر ہوچکی تھی، سمندرایک کے بعدایک لاش اگلتا رہا۔
