کراچی : سمندری طوفان شدت اختیار کرگیا، طوفان12کلومیٹر فی گھنٹہ کی رفتار سے شمال مغرب میں بڑھ رہا ہے،3دن تک سندھ کے جنوبی اور ساحلی علاقوں میں بارشوں کا امکان ہے۔
تفصیلات کے مطابق محکمہ موسمیات نے پیش گوئی کی ہے کہ وایو طوفان شدت اختیار کرگیا ہے جس کے باعث جمعرات سے ٹھٹھہ، بدین، تھرپارکر اور گردونواح میں گرج چمک کے ساتھ بارشیں متوقع ہیں۔
وایو طوفان کے سندھ میں داخل ہونے کے امکانات قوی ہوگئے ہیں، سمندری طوفان کراچی سے443کلومیٹر جنوب مشرق میں موجود ہے، طوفان12کلومیٹر فی گھنٹہ کی رفتار سے شمال مغرب میں بڑھ رہا ہے۔
محکمہ موسمیات کا کہنا ہے کہ سمندری طوفان کل دوپہر تک بھارتی گجرات عبور کرلے گا، طوفان کے بعد3دن تک سندھ کے جنوبی اور ساحلی علاقوں میں بارشوں کا قوی امکان ہے، جس کے نتیجے میں ٹھٹھہ، بدین، تھرپارکر اور گردونواح میں گرج چمک کے ساتھ بارشیوں کا سلسلہ شروع ہوجائے گا۔
مزید پڑھیں: سمندری طوفان وایو کل بھارتی ریاست گجرات کے ساحل سے ٹکرائے گا، ہائی الرٹ جاری
اس کے علاوہ کراچی میں کل بھی دوپہر میں گردآلود ہوائیں چلنے کاسلسلہ جاری رہے گا، محکمہ موسمیات کے مطابق گرد آلود ہواؤں سے حدنگاہ جزوی متاثر ہوسکتی ہے، طوفان کے اثرات سے شہر میں ہلکی بارش کا بھی امکان ہے۔
