گلگت : دیامر میں اسکول جلانے والے دہشت گردوں کی تلاش کیلئے سیکیورٹی فورسز نے مختلف مقامات پرسرچ آپریشن کیا، آپریشن کے دوران 10 مشتبہ افراد کو گرفتار کرلیا گیا ہے۔
تفصیلات کے مطابق گلگت بلتستان کے ضلع دیامرمیں دیامر میں اسکول جلانے والوں کی تلاش کے لئے مختلف علاقوں میں پولیس کا سرچ آپریشن جاری ہے، آپریشن کے دوران اب تک 10 مشتبہ افراد کو گرفتار کرلیا گیا ہے۔
گلگت بلتستان حکومت کے ترجمان فیض اللہ فراق کا کہنا ہے کہ چلاس داریل وتانگیر میں شرپسند عناصر کے خلاف کارروائیاں کی گئیں، علاقے کے داخلی وخارجی راستوں پر سخت چیکنگ کا سلسلہ بھی جاری ہے۔
دوسری جانب چیف جسٹس آف پاکستان نے دیامر میں اسکولوں کو جلانے کے واقعے کا از خود نوٹس لیتے ہوئے سیکرٹری داخلہ،سیکرٹری گلگت بلتستان سے 48 گھنٹے میں رپورٹ طلب کرلی ہے۔
اس سے قبل ایف سی این اے ہیڈکوارٹرمیں ایک اعلیٰ سطحی اجلاس کا انعقاد کیا گیا تھا ، جس میں پاک فوج، پولیس، انتظامیہ ودیگر قانون نافذ کرنے والے اداروں نے تعلیمی اداروں کی فول پروف سیکیورٹی اور دہشت گردوں کے خلاف سخت کارروائی کا فیصلہ کیا۔
مزید پڑھیں : چلاس میں لڑکیوں کے 12 اسکول نذر آتش
گذشتہ روز گلگت بلتستان کے ضلع دیامرکے علاقے چلاس میں جمعرات اور جمعہ کی درمیانی شب نامعلوم تعلیم دشمن شر پسندوں نے 12 اسکولوں میں توڑ پھوڑ کرتے ہوئے آگ لگا دی تھی۔
دہشت گردوں نے لڑکیوں کے دو پرائمری اسکول بھی بارود سے اڑائے دیے تھے۔
خیال رہے کہ علم روشنی سے خوفزدہ دشمن پہلے بھی خیبرپختونخوامیں لڑکیوں کے کئی اسکول تباہ اوردھماکوں سے اڑا چکےہیں۔
