دنیا بھر میں مقبول ترین میسجنگ ایپ واٹس ایپ میں آئے روز نئے نئے فیچرز متعارف کروائے جاتے ہیں اور حال ہی میں ایک اور کارآمد فیچر متعارف کروایا گیا ہے۔
واٹس ایپ میں متعدد نئے فیچرز کا اضافہ ہوچکا ہے اور اسی لیے یہ دنیا کی مقبول ترین میسجنگ ایپ ہے، مگر اس ایپ میں اتنے زیادہ فیچرز اور فنکشنز موجود ہیں کہ انہیں یاد رکھنا یا ڈھونڈنا اکثر افراد کے لیے آسان نہیں ہوتا۔
یہی وجہ ہے کہ واٹس ایپ میں ایک ایسا نیا فیچر متعارف کروایا جا رہا ہے جو صارفین کی زندگی کو آسان بنائے گا۔
وی بیٹا انفو کی رپورٹ کے مطابق واٹس ایپ کے اینڈرائیڈ ڈیوائسز کے لیے نئے بیٹا ورژن میں سیٹنگز میں سرچ آپشن کو متعارف کروایا گیا ہے۔
واٹس ایپ سیٹنگز میں متعدد آپشنز موجود ہوتے ہیں جن کو ڈھونڈنا اکثر مشکل ہوتا ہے اور اسی لیے سیٹنگز مینیو میں ایک نئے سرچ بٹن کا اضافہ کیا گیا ہے۔
اس سرچ آپشن کے ذریعے آپ مطلوبہ سیٹنگ یا فیچر تک براہ راست پہنچ سکتے ہیں اور سیٹنگز کے اندر جا کر ڈھونڈنے کی ضرورت نہیں ہوگی۔
جیسے واٹس ایپ بیک اپ کو دیکھنا چاہتے ہیں، پرائیوسی سیٹنگز پر نظر ڈالنا چاہتے ہیں یا فون پر موجود واٹس ایپ میڈیا فائلز کو ڈیلیٹ کرنا چاہتے ہیں، تو کسی بھی آپشن کے لیے سیٹنگز مینیو میں جا کر وقت ضائع کرنے کی ضرورت نہیں ہوگی۔
بظاہر تو یہ معمولی تبدیلی نظر آتی ہے مگر یہ انتہائی کارآمد ہے اور یقیناً آپ کو پسند آئے گی۔
