اقوام متحدہ نے یو این سکریٹری جنرل انتونیو گوتریس پر اسرائیل کی جانب سے سفری پابندی کو اسرائیلی حکومت کی طرف سے اپنے عملے پر ایک اور حملہ قرار دیا ہے۔
ترجمان سیکریٹری جنرل اسٹیفن ڈجارک نے کہا ہے کہ انتونیو گوتریس سے متعلق پابندی کا بیان اقوام متحدہ کے عملے پر اسرائیلی حکومت کی جانب سے سے ایک اور حملہ ہے۔
ترجمان نے اسرائیل کے الزامات کو مسترد کرتے ہوئے کہا کہ گوتریس نے حماس کی کارروائیوں کی ہمیشہ مذمت کی ہے۔ واضح رہے کہ گزشتہ روز اسرائیلی وزیر خارجہ نے انتونیو گوتریس کو ناپسندیدہ شخصیت قرار دیتے ہوئے ان کے لیے ملک کے دروازے بند کر دیے۔
خیال رہے کہ اسرائیل غزہ جنگ کے آغاز ہی سے نہ صرف اقوام متحدہ کے سیکریٹری جنرل پر الزامات عائد کرتا رہا ہے، بلکہ یو این کے مختلف پناہ گزین کیمپوں اور اسکولوں پر بمباری بھی کرتا رہا ہے۔
اسرائیل نے سیکریٹری جنرل اقوام متحدہ کا ملک میں داخلہ بند کر دیا
الجزیرہ کے مطابق انتونیو گوتریس نے عالمی ادارے کی طاقت ور سلامتی کونسل کو بتایا کہ مشرق وسطیٰ میں کشیدگی میں کمی ناگزیر ہو گئی ہے۔
بدھ کو گوتریس نے کونسل کے ہنگامی اجلاس میں کہا غزہ میں اسرائیل کی بمباری اور لبنان پر حملوں میں خطے کے شہری ایک خوف ناک قیمت ادا کر رہے ہیں جس کی میں مکمل مذمت کرتا ہوں۔ انھوں نے زور دے کر کہا کہ لبنان میں ’’ہمہ جہت جنگ‘‘ کو روکنا ضروری ہے، جس کے تباہ کن نتائج ہوں گے۔
