اسلام آباد: وفاقی دارالحکومت اسلام آباد میں دفعہ 144 نافذ کردی گئی۔ انتظامیہ کی جانب سے مخصوص مقامات پر پرامن احتجاج کی اجازت ہوگی۔
تفصیلات کے مطابق ضلعی انتظامیہ نے اسلام آباد میں دفعہ 144 نافذ کرتے ہوئے کہا ہے کہ کسی بھی جگہ احتجاج کرنے کے لیے این او سی کا حصول لازمی ہے۔
ضلعی انتظامیہ کی جانب سے اسلام آباد کے مختلف مقامات پر مظاہرہ کرنے والے افراد کو مراسلہ بھی بھیجا گیا ہے جس میں مظاہرین کو آخری وارننگ دی گئی۔
مراسلے میں کہا گیا ہے کہ کسی بھی جگہ احتجاج کے لیے این او سی کا ہونا لازمی ہے، بغیر اجازت لیے احتجاج کرنے پر قانونی کارروائی کی جائے گی۔
ڈسٹرکٹ مجسٹریٹ کی جانب سے واضح کیا گیا ہے کہ مظاہرین کو تاحال کسی قسم کا این او سی جاری نہیں کیا گیا، خلاف ورزی کرنے والوں سے آہنی ہاتھوں سے نمٹا جائے گا۔
خیال رہے کہ ملک کی موجودہ صورتحال کے پیش نظر گزشتہ روز صوبہ سندھ میں بھی دفعہ 144 نافذ کردی گئی تھی۔
سندھ حکومت کی جانب سے جاری کردہ نوٹیفکیشن میں کہا گیا کہ دفعہ 144 کے تحت صوبے بھر میں اسلحہ لے کر چلنے اور جلسے جلوسوں پر پابندی عائد رہے گی۔
صوبائی حکومت نے آئندہ 10 روز تک کے لیے صوبے بھر میں ڈبل سواری پر بھی پابندی عائد کردی ہے۔
