واشنگٹن: پاکستان تحریک انصاف (پی ٹی آئی) کے احتجاجی مظاہروں کے پیشِ نظر امریکی محکمہ خارجہ نے پاکستان میں مقیم اپنے تمام شہریوں کیلیے نیا سکیورٹی الرٹ جاری کر دیا۔
سکیورٹی الرٹ میں محکمہ خارجہ نے کہا کہ موبائل فون اور انٹرنیٹ سروس میں رکاوٹیں ہیں، مظاہرے اور بڑے ہجوم 7 اکتوبر کے بعد بھی جاری رہ سکتے ہیں لہٰذا شہری بڑے اجتماعات سے گریز کریں۔
محکمہ خارجہ نے کہا کہ امریکی مشن کے اہلکاروں کی نقل و حرکت متاثر ہو سکتی ہے، امریکی شہریوں کو یاد دلایا جاتا ہے کہ مظاہرے اور اجتماعات پُرتشدد ہو سکتے ہیں، انٹرنیٹ اور موبائل فون سروس کی بندش جاری ہے۔
سکیورٹی الرٹ میں کہا گیا کہ امریکی شہری مظاہروں اور دیگر بڑے اجتماعات سے گریز کریں، پاکستان میں مقیم امریکی شہری احتیاط برتیں، اگر آپ کسی بڑے اجتماع یا مظاہرے کے آس پاس ہوں تو علاقہ چھوڑ دیں۔
مزید کہا گیا کہ امریکی شہری معلومات کیلیے مقامی میڈیا کی نگرانی کریں اور اپنے اردگرد کے حالات سے آگاہ رہیں، شہری شناخت اپنے ساتھ رکھیں اور حکام کے ساتھ تعاون کریں۔
