عیدالاضحیٰ کی آمد سے قبل کراچی نادرن بائی پاس پر مویشی منڈی سج چکی ہے اس سال سیکیورٹی اقدامات کیا ہیں ڈی آئی جی ویسٹ نے بتا دیا۔
ڈی آئی جی ویسٹ عرفان بلوچ نے نادرن بائی پاس پر قائم کراچی کی مرکزی مویشی منڈی کا دورہ کیا اور سیکیورٹی انتظامات کا جائزہ لیا۔
اس موقع پر ڈی آئی جی نے میڈیا سے گفتگو کرتے ہوئے بتایا کہ نادرن بائی پاس پر قائم کی گئی مویشی منڈی آنے والے راستوں پر چار پگٹس قائم کی جائیں گی جب کہ ایک ہزار سے زائد پولیس اہلکار، کمانڈوز تعینات کیے جائیں گے۔
عرفان بلوچ کا کہنا تھاکہ مویشی منڈی اور آنے والوں کی حفاظت کے لیے رینجرز بھی سیکیورٹی کے فرائض انجام دیں گے۔ اس کے ساتھ ساتھ سی ٹی ڈی اور اسپیشل برانچ کے اہلکار بھی الرٹ رہیں گے۔
ان کا کہنا تھا کہ ہماری کوشش ہے کہ مویشی منڈی آنے والے راستوں پر ایک بھی واردات نہ ہو۔ نادرن بائی پاس پر لگنے والی مویشی منڈی کو تیسرا سال ہے پچھلے سال بھی پولیس نے احسن اقدام کیے ایک بھی واردات نہیں ہوئی تھی۔
ڈی آئی جی ویسٹ نے کہا کہ ایڈمنسٹریشن مویشی منڈی کے ساتھ مسلسل رابطے میں ہیں۔ گلشن معمار، نادرن بائی پاس سمیت تمام راستوں پر سیکیورٹی تعینات ہوگی۔ ہم نے کنٹرول روم قائم کر دیا ہے۔ نادرن بائی پاس کو لگنے والے اضلاع کو بھی سیکیورٹی سسٹم میں شامل کریں گے۔
اس موقع پر مویشی منڈی کے ایڈمنسٹریٹر شہاب علی نے کہا کہ ببرلو میں دھرنے کی وجہ سے بڑی تعداد میں جانوروں کے ٹرک راستے میں پھنسے ہوئے ہیں۔ اگلے جمعہ تک یہ مویشی منڈی نادرن بائی پاس اپنے جوبن پر ہوگی۔
