پشاور کے علاقے بڈھ بیر میں سیکیورٹی فورسز نے مؤثر کارروائی کے دروان فائرنگ کے تبادلے میں 4 دہشت گرد ہلاک ہو گئے۔
انٹر سروسز پبلک ریلیشنز (آئی ایس پی آر) کے مطابق دہشت گردوں کی موجودگی کی خفیہ اطلاع پر آپریشن کیا گیا، سیکیورٹی فورسز نے پشاور کے علاقے بڈھ بیر میں آپریشن کیا، فورسز کی مؤثر کارروائی میں 4 دہشت گرد مارے گئے۔
ترجمان کے مطابق ہلاک دہشت گردوں میں مطلوب کمانڈر سمیع اللہ، سلمان، عمران اور عمر شامل ہیں، تمام ہلاک دہشت گرد سیکیورٹی فورسز کو انتہائی مطلوب تھے۔
آئی ایس پی آر کے مطابق ہلاک دہشتگردوں سے اسلحہ، گولہ بارود اور دھماکا خیز مواد بھی برآمد کرلیا گیا ہے۔
اس کے علاوہ ڈی آئی خان کے علاقےکلاچی میں انٹیلی جنس بیسڈ آپریشن کیا جہاں شدید فائرنگ کے تبادلے میں لانس نائیک محمد اعجاز خان شہید ہوگئے ہیں۔
ترجمان کے مطابق علاقے میں ممکنہ دہشت گردوں کی تلاش اور خاتمے کیلئے کلیئرنس آپریشن جاری ہے، سیکیورٹی وطن سے دہشت گردی کے خاتمے کیلئے پرعزم ہے۔
