نیویارک: امریکا میں واقع ایک کلینک کے اندر کی ایک ویڈیو وائرل ہو رہی ہے، جس میں سیکیورٹی گارڈ اور ایک رائفل بردار میں دل دہلا دینے والی کشمکش دیکھی گئی۔
ایک غیر ملکی خبر رساں ادارے کے مطابق یہ واقعہ 10 نومبر کو نیویارک کے شہر بفیلو میں پیش آیا، بفیلو پولیس نے اس کی ویڈیو ٹوئٹر پر شیئر کی۔
ویڈیو میں دیکھا جا سکتا ہے کہ ایک سیکیورٹی گارڈ نے کلینک کے اندر اے آر ففٹین رائفل کے ساتھ اندر داخل ہونے والے شوٹر پر اچانک چھلانگ لگا دی، اور اسے بے بس کر دیا۔
پولیس کے مطابق رائفل بردار کو 48 سالہ جیریمی گریفن کے نام سے شناخت کیا گیا، جیسے ہی وہ کلینک میں داخل ہوا، اس نے ایک فائر بھی مار دیا، جس سے وہاں پہلے سے کھڑا سیکیورٹی گارڈ بال بال بچ گیا۔
This happened on Virginia street in Buffalo Ny last week! That guy is definitely a hero, he saved so many lives!! 🥰 pic.twitter.com/2kYV9XgcSH
— Iasia Davis (@IasiaDavis) November 14, 2022
سیکیورٹی گارڈ نے پہلے تو جان بچانے کے لیے بھاگنے کی راہ ڈھونڈی لیکن ناکامی پر اس نے اچانک بندوق بردار پر چھلانگ لگا دی، اور اسے دیوار کے ساتھ لگا دیا۔
سیکیورٹی گارڈ نے شوٹر کی رائفل بھی پکڑ لی تھی جس کے سبب وہ مزید فائر نہ کر سکا، اور اسی حالت میں اسے کلینک کے باہر گھسیٹنے میں کامیاب ہو گیا۔
And here’s how it “ended” outside for those inquiring. pic.twitter.com/Iu9XwgMeJt
— Jeremy (@Jeremy_Will12) November 15, 2022
اسپتال کے باہر سے سیکیورٹی فوٹیج میں سیکیورٹی گارڈز کو شوٹر کو زمین پر گراتے ہوئے دکھایا گیا ہے، راہگیروں نے بھی شوٹر سے اسلحہ چھیننے میں مدد کی۔
پولیس کے مطابق کلینک آنے سے پہلے شوٹر نے ایک خاتون کے گھر میں گھس کر اس کی ٹانگ میں گولی ماری تھی، جس سے وہ شدید زخمی ہو گئی، بفیلو پولیس نے بتایا کہ شوٹر پر قتل کی کوشش سمیت متعدد سنگین جرائم کے الزامات عائد کر دیے گئے ہیں۔