کراچی کے علاقے گلشن معمار میں بیٹے کو کھیلنے سے منع کرنے پر بااثر شخص نے سیکیورٹی گارڈ کو تشدد کا نشانہ بنا ڈالا۔
اے آر وائی نیوز کے مطابق کراچی کے علاقے گلشن معمار میں بااثر شخص نے معمولی بات پر سیکیورٹی گارڈ کو پستول کے بٹ مار کر زخمی کردیا، سیکیورٹی گارڈ کے سر پر شدید چوٹیں آئیں۔
بااثر شخص کی سیکیورٹی گارڈ پر تشدد کی سی سی ٹی وی فوٹیج منظرعام پر آگئی، ویڈیو میں بااثر شخص کو گارڈ پر تشدد کرتے ہوئے واضح طور پر دیکھا جاسکتا ہے۔
متاثرہ سیکیورٹی گارڈ کا کہنا ہے کہ بچوں کو سڑک پر کھیلنے سے منع کیا تھا تو مجھے تشدد کا نشانہ بنایا گیا۔
متاثرہ سیکیورٹی کے مطابق بااثر شخص کے خلاف کارروائی کے لیے پولیس تعاون نہیں کررہی، بااثر شخص کے خلاف کارروائی کرکے انصاف فراہم کیا جائے۔
واضح رہے کہ مارچ کے اوائل میں کراچی کے علاقے ڈیفنس میں بااثر شخص کے بیٹے نے مسلح محافظوں کے ساتھ مل کر ایک ہوٹل مالک کو تشدد کا نشانہ بنایا تھا۔
بعدازاں پولیس نے کارروائی کرتے ہوئے ملزم کو گرفتار کرلیا تھا، بااثر شخص کے بیٹے نے ہوٹل مالک کو دھمکیاں دی تھیں اور کافی شاپ پر خاتون کو بھی ہراساں کیا تھا۔
