کراچی: صوبہ سندھ کے دارالحکومت کراچی میں بلدیاتی انتخابات کے موقع پر 40 ہزار سے زائد سیکیورٹی اہلکار تعینات کیے جارہے ہیں، شہر کے 4 ہزار سے زائد تمام پولنگ اسٹیشنز حساس اور انتہائی حساس قرار دیے گئے ہیں۔

تفصیلات کے مطابق کراچی پولیس چیف جاوید عالم اوڈھو نے پریس کانفرنس میں کہا کہ بلدیاتی انتخابات سے متعلق پلان جاری کردیا گیا ہے، 40 ہزار سے زائد فورسز اہلکار کو ڈیوٹی پر تعینات کر رہے ہیں۔

کراچی پولیس چیف کا کہنا ہے کہ دوسرے اضلاع سے بھی نفری بلائی گئی ہے، پولیس کے ساتھ رینجرز بھی تعینات ہوگی۔

انہوں نے کہا کہ کراچی میں 4 ہزار سے زائد پولنگ اسٹیشنز ہیں، تمام پولنگ اسٹیشنز حساس اور انتہائی حساس ہوں گے۔

جاوید عالم کا کہنا تھا کہ 24 ہزار 968 اہلکار پولنگ اسٹیشنز پر تعینات ہوں گے، کیو آر ایف کے 5 ہزار سے زائد اہلکار بھی الرٹ ہوں گے۔