وریندر سہواگ نے بابر اعظم کو خراب فارم پر قابو پانے کے لیے اہم مشورہ دے دیا۔
بھارت کے سابق کرکٹر وریندر سہواگ نے اسٹار بلے باز بابر اعظم کی فارم میں حالیہ خرابی سے واپسی کی صلاحیت پر اعتماد کا اظہار کیا ہے۔
سہواگ کا خیال ہے کہ بابر کی جدوجہد ان کے کھیل میں تکنیکی خامیوں سے زیادہ ذہنی چیلنجوں سے ہوتی ہے۔
بابر کو حال ہی میں انگلینڈ کے خلاف دوسرے اور تیسرے ٹیسٹ کے لیے پاکستانی اسکواڈ سے باہر کر دیا گیا تھا، یہ ایک اہم فیصلہ نو تشکیل شدہ سلیکشن پینل نے کیا ہے جس کا مقصد ٹیم کی کارکردگی کو نئے سرے سے بحال کرنا ہے۔
شعیب اختر کے یوٹیوب چینل پر بات کرتے ہوئے سہواگ نے بابر کو مشورہ دیا کہ وہ بنیادی باتوں پر توجہ دیں اور اپنا اعتماد بحال کرنے کے لیے ڈومیسٹک کرکٹ میں واپس آئیں۔
ان کا کہنا تھا کہ بابر اعظم کو اب ڈومیسٹک کرکٹ کھیلنی چاہیے، انھیں اپنی فٹنس پر کام کرنا چاہیے انھیں خاندان کے ساتھ کچھ وقت گزارنا چاہیے پھر ایک جسمانی طور پر فٹ اور ذہنی طور پر مضبوط کھلاڑی کے طور پر انٹرنیشنل کرکٹ میں واپس آنا چاہیے۔
سابق ہندوستانی اوپنر نے اس مشکل دور میں ذہنی لچک کی اہمیت پر زور دیا یہ نوٹ کرتے ہوئے کہ بابر تکنیکی سے زیادہ نفسیاتی طور پر متاثر ہوئے ہیں۔
