حوثیوں نے گلیکسی لیڈر نامی جس اسرائیلی بحری جہاز کو قبضے میں لیا تھا وہ سیاحوں کی توجہ کا مرکز بن گیا ہے۔
غیر ملکی میڈیا رپورٹس کے مطابق ایران کے حمایت یافتہ حوثی باغیوں کے کمانڈر کا کہنا ہے کہ اسرائیل سے منسلک بحری جہاز لوگوں کی دل چسپی کا مرکز بنا ہوا ہے۔
اسرائیل کی جانب سے لیز پر لیے ہوئے کارگو جہاز گلیکسی لیڈر کو نومبر میں یمن میں سرگرم حوثی باغیوں نے اپنے قبضے میں لیا تھا، یہ جہاز اب بحیرہ احمر کی بندرگاہ السلف میں لنگر انداز ہے۔
جہاز کو دیکھنے روزانہ کی بنیاد پر سیاح آنے لگے ہیں، گلیکسی لیڈر کو دیکھنے آنے والے سیاح جہاز تک مچھلیاں پکڑنے والی چھوٹی کشتیوں کے ذریعے پہنچتے ہیں، جہاز کے ڈیک پر ان کا استقبال کیا جاتا ہے۔
جب سیاح جہاز پر آتے ہیں تو وہاں ڈیک کے فرش پر پڑے اسرائیلی اور امریکی جھنڈوں کو قدموں تلے روندتے ہیں، جب کہ پس منظر میں حوثیوں کے روایتی گانے بجتے ہیں۔
سیاح بہت دل چسپی کے ساتھ جہاز کے عرشے پر گھوم پھر دیکھتے ہیں اور سیلفیاں بھی لیتے ہیں۔ حوثیوں کے میڈیا افسر سمیر الربیط نے روئٹرز کو بتایا کہ بڑی تعداد میں یمنی اب پارکوں اور ساحلوں پر جانے کی بجائے گلیکسی جہاز کا دورہ کرنے آتے ہیں۔
