کراچی: اپنے پیاروں کی قبروں پر فاتحہ خوانی کیلئے آنے والوں کیلئے قبرستان کے داخلی دروازوں پر پھول پتیاں فروخت کرنے والوں کی دکانیں اور کیبنز موجود ہوتے ہیں۔
ان ہی دکانداروں میں ایک بررگ خاتون بھی ہیں جو کراچی کے میوہ شاہ قبرستان کے باہر گزشتہ 50سال سے شہریوں کو پُھول پتیاں فروخت کرتی ہیں۔
ستر سال سے زائد عمر کی باہمت بیوہ خاتون نورالنساء جو کسی کے آگے ہاتھ پھیلانے کے بجائے خود محنت کرکے اپنا گزر بسر کررہی ہیں۔
اے آر وائی نیوز کراچی کی نمائندہ روحہ فاطمہ سے گفتگو کرتے ہوئے ان کا کہنا تھا میرے دس بچے ہیں جنہیں شوہر کے انتقال کے بعد پال پوس کر بڑا کیا ان کی شادیاں کیں لیکن کبھی کسی سے مدد لینے کیلئے اپنا ہاتھ نہیں پھیلایا۔
نورالنساء نے بتایا کہ شوہر کے دنیا سے چلے جانے کے بعد ایسے حالات میں گھر چلانے کے لیے کچھ نہ کچھ تو کرنا ہی تھا۔ میرے والدین کہا کرتے تھے کہ مانگنے سے بہتر کمانا ہے۔
انہوں نے بتایا کہ میرا چھوٹا بیٹا مجھ سے کہتا ہے گھر بیٹھو میں تمہارا پورا خرچہ دوں گا لیکن میں نے منع کردیا۔
