اسلام آباد : حکومت نے مدارس رجسٹریشن بل پر جے یو آئی کے سربراہ مولانا فضل الرحمان کو اعتماد میں لینے کا فیصلہ کرلیا۔
تفصیلات کے مطابق حکومت نے مدارس رجسٹریشن بل پر ڈیڈلاک ختم کرنے کی کوششیں تیز کردیں اور مولانا فضل الرحمان کو اعتماد میں لینے کا فیصلہ کرلیا۔
حکومتی ذرائع نے بتایا ہے کہ مولانافضل الرحمان کے تحفظات دور کئے جائیں گے، اس سلسلے میں حکومت اور جے یو آئی میں رابطے ہوئے۔
مدارس رجسٹریشن بل میں حکومت کی طرف سےبعض تبدیلیاں لائی گئی ہیں ، مجوزہ تبدیلی کے مسودے پر جے یو آئی سےمشاورت کی جائےگی۔
ذرائع جے یو آئی کا کہنا ہے کہ حکومتی رابطوں سےمولانافضل الرحمان کوآگاہ کردیاگیا ہے، بل میں تبدیلی پر مشاورت کے بعد فیصلہ کیاجائے گا۔
مزید پڑھیں : مدارس رجسٹریشن بل : نواز شریف کا وزیراعظم شہبازشریف کو مفاہمت کا مشورہ
یاد رہے وزیراعظم نے مسلم لیگ ن کے صدر کو مولانافضل الرحمان کے مدارس بل پر اعتماد میں لیا، جس پر پارٹی صدر نے بھی شہبازشریف کو مفاہمت کامشورہ دیا تھا۔
مسلم لیگ ن کے صدر نے وزیر اعظم کو مدارس بل پر مولانا فضل الرحمان کے تحفظات دور کرنے کی بھی ہدایت کی، وزیر اعظم نے یقین دہانی کرائی کہ مولانا فضل الرحمان کو مدارس بل پر بھی اعتماد میں لیا جائے گا۔
خیال رہے سربراہ جمعیت علمائے اسلام (ف) نے مدارس رجسٹریشن بل کے معاملے پر اپنے کارکنان کو جلد اسلام آباد مارچ کیلیے کال دینے کا اعلان کرتے ہوئے کہا تھا کہ کارکن تیار رہیں، ہم وہ لوگ نہیں جنہیں حکومت اسلام آباد آنے سے روک سکے۔
