اسلام آباد : مردم شماری 2017 کے عبوری اعداد وشمار پر ادارہ شماریات سینیٹ کی قائمہ کمیٹی کو مطمئن نہ کرسکا، سینیٹ نے چند بلاکس میں آزمائشی سروے کی تجویز دے دی۔
تفصیلات کے مطابق مردم شماری 2017 کے عبوری اعداد وشمار پر بحث و مباحثہ زور و شور سے جاری ہے جب کہ کئی سیاسی جماعتوں کی جانب سے ان اعداد وشمار پر تحفظات بھی سامنے آئے ہیں جس کی بازگشت سینیٹ تک سنی گئی اور قائمہ کمیٹی برائے نجکاری نے ادارہ شماریات سے تفصیلات طلب کرلیں۔
ذرائع کے مطابق مردم شماری کے نتائج پر سینیٹ کی قائمہ کمیٹی برائے نجکاری کو ادارہ شماریات مطمئن کرنے میں ناکام رہا جس پر قائمہ کمیٹی کی جانب سے مردم شماری کے نتائج کو جانچنےکے لیے مخلتف علاقوں سے منتخب کردہ چند بلاکس میں پوسٹ سروے کی تجویز دی گئی ہے جس سے پوسٹ اینالائسز کرنا آسان ہوجائے گا۔
قائمہ کمیٹی کی تجویز پر چیف ادارہ شماریات آصف باجوہ کا کہنا تھا کہ فوج کومردم شماری کی سپروژن دینے کا مقصد کریڈیبلٹی، شفافیت اورسیکیورٹی کو برقرا رکھنا تھا اور دوبارہ پوسٹ اینالائسزکے لیے اس تجربے کو دہرانا ہوگا جس کے لیے وہی ماحول اور فوج درکار ہوگی۔
چیئرمین قائمہ کمیٹی برائے نجکاری سینیٹر سلیم مانڈوی والا نے کہا کہ چیف شماریات کے پاس موجود اعداد و شمار فوج کے پاس بھی ہیں اس معاملے پر مشترکہ مفادات کمیٹی کے سامنے رکھا جائے گا جب کہ تحریک انصاف کے نمائندے نے 1600 بلاکس میں دوبارہ سروے کی تجویز رکھ دی۔
