اسلام آباد: سینیٹ کی قائمہ کمیٹی برائے دفاعی پیداوار کے چیئرمین مشاہد حسین سید کا کہنا ہے کہ امریکا اور بھارت کے درمیان سیٹلائٹ اور جغرافیائی ڈیٹا کے تبادلے کا معاہدہ ہوا ہے، معاہدے سے علاقائی امن کے لیے خطرات پیدا ہوگئے ہیں۔
تفصیلات کے مطابق سینیٹ کی قائمہ کمیٹی برائے دفاعی پیداوار کا اجلاس چیئرمین مشاہد حسین سید کی زیر صدارت ہوا۔ چیئرمین نے بتایا کہ امریکا اور بھارت کے درمیان سیٹلائٹ اور جغرافیائی ڈیٹا کے تبادلے کا معاہدہ ہوا ہے۔
مشاہد حسین کا کہنا تھا کہ امریکا اور بھارت کے درمیان معاہدے سے علاقائی امن کے لیے خطرات پیدا ہوگئے ہیں، امریکا 21 ارب ڈالرز کی دفاعی مصنوعات بھارت کو فروخت کر چکا ہے۔
انہوں نے کہا کہ ہندوستان کے چین، نیپال، بنگلہ دیش اور پاکستان کے ساتھ تنازعات ہیں، بھارت مقبوضہ جموں و کشمیر میں مسلسل ظلم و بربریت روا رکھے ہوئے ہے۔
اجلاس میں سینیٹر محمد اکرم کا کہنا تھا کہ بھارتی مشیر قومی سلامتی نے پاکستان اور چین سے دو طرفہ جنگ کا اعلان کیا، سینیٹر نعمان وزیر نے کہا کہ پاکستان نے 27 فروری کو جدید ترین مواصلاتی ٹیکنالوجی سے بھارت کو شکست دی۔
