اسلام آباد : اپوزیشن کی مخالفت کے باوجود منی بل سینیٹ سے منظور کرلیا گیا، اپوزیشن اراکین نے شدید احتجاج کرتے ہوئے نا منظور نا منظور کے نعرے لگائے۔
تفصیلات کے مطابق چیئرمین صادق سنجرانی کی زیرصدارت سینیٹ کا اجلاس ہوا، اجلاس میں منی بل سے متعلق فنانس کمیٹی کی رپورٹ پیش کی گئی، اپوزیشن کی مخالفت کے باوجود منی بل سینیٹ سے منظور کرلیا گیا جس پر اپوزیشن اراکین نے شدید احتجاج کیا،اراکین نے نا منظور نا منظور کے نعرے بھی لگائے۔
سینیٹ میں قائد حزب اختلاف شیری رحمان نے کہا کہ اپوزیشن اس تمام عمل کو مسترد کرتی ہے، حکومت نے آرڈیننس فیکٹری قائم کر رکھی ہے، ان کا کہنا تھا کہ سینیٹ کے اجلاس میں منی بل پر رائے شماری نہیں کرائی گئی جو خلاف قانون ہے۔
اس موقع پر چیئرمین سینیٹ صادق سنجرانی نے کہا کہ متعلقہ کمیٹی میں اپوزیشن کی سفارشات شامل ہیں تو اب کیااعتراض ہے، چیئرمین ایک دفعہ فیصلہ کر لے تو وہ حتمی ہوتا ہے۔
علاوہ ازیں اجلاس کے آغاز میں سانحہ کوئٹہ کے شہداء کے لئے فاتحہ خوانی بھی کی گئی۔