اسلام آباد: سینیٹ کے اجلاس کے دوران جادوگروں کے خلاف کارروائی کے لیے تحریک پیش کردی گئی ، چیئرمین سینیٹ نے معاملہ بل کمیٹی کے سپرد کردیا اور کہا کہ اسلامی نظریاتی کونسل سے بھی نقطہ نظر حاصل کیا جائے۔
تفصیلات کے مطابق سینیٹ کا اجلاس آج چیئرمین سینیٹ رضا ربانی کی زیر صدارت شروع ہوا جس میں سینیٹر چوہدری تنویر نے جادوگروں کے خلاف کارروائی کے لیے تحریک التوا پیش کرتے ہوئے کہا کہ جادو ٹونہ ہمارے معاشرے میں سنجیدہ مسئلہ ہے، سفلی عمل کرنے والے لوگ بہت زیادہ ہیں مختلف ٹی وی چینلز نے ایسے بہت سے لوگوں کو بے نقاب بھی کیا ہے تاہم چند دن بعد یہ عمل دوبارہ شروع ہوجاتا ہے
انہوں نے مطالبہ کیا کہ بنگالی باباؤں کے لیے مناسب قانون سازی ہونی چاہیے۔
جواب میں چیئرمین سینیٹ رضا ربانی نے معاملہ بل کمیٹی کے سپرد کر دیا اور کہا کہ کمیٹی اسلامی نظریاتی کونسل کا نقطہ نظر بھی لازمی طور پر حاصل کرے۔
