اسلام آباد : سینیٹ کے اجلاس میں نون لیگ اورپیپلزپارٹی کے ارکان کے درمیان لفظوں کی گرما گرم جنگ ہوئی۔ مشاہد اللہ نے پی پی کو بے نظیر قتل میں ملوث ٹھہرایا تو اعتزازاحسن نے نون لیگ کی میگا کرپشن کا پول کھول دیا۔
سینیٹ کا اجلاس تقاریر کے دوران گرما گرم جنگ میں تبدیل ہو گیا۔ ن لیگ کے مشاہد اللہ سینیٹ اجلاس میں خوب گرجے اور گرجتے ہوئے پی پی پرالزام لگایا کہ پارٹی نے بے نظیر کے قتل کی تحقیقات اس لئے نہیں کرائیں کیونکہ وہ خود قتل میں ملوث تھی۔
مارک سیگل کا بیان پی پی کے افراد کے ملوث ہونے کا واضح ثبوت ہے۔ اس پر رحمان ملک نے رد عمل کرتے ہوئے کہا کہ پیپلز پارٹی پر بے نظیر قتل کا الزام بے بنیاد ہے۔
بے نظیر کے قاتل بے نقاب ہوچکے ہیں۔ اس موقع سے فائدہ اٹھاتے ہوئے اعتزاز احسن ن لیگ کی میگا کرپشن کے پول کھولنے لگے اور کہا کہ ن لیگ بدعنوانی میں ملوث ہے۔
نندی پورآڈٹ کی انکوائری کوتسلیم نہیں کرینگے۔ جس پر مشاہد اللہ نے ترکی بی ترکی کہا کہ اعتزاز صاحب میاں نواز شریف کے لاہور سے کامیاب کرانے کا ہی کچھ خیال کر لیتے۔
