اسلام آباد : سینٹ نے سی ایس ایس امتحان میں انگریزی کےساتھ اردو کے آپشن کی قرارداد متفقہ طور پر منظور کرلی، وزیر پارلیمانی امور علی محمد خان نے کہا سی ایس ایس کے امتحان میں زبان کا انتخاب اختیاری ہوناچاہیے جبکہ سراج الحق کا کہنا تھا اردو زبان ایک سمندر ہے جس میں بہت سی زبانوں کے الفاظ ہیں۔
تفصیلات کے مطابق سینیٹ اجلاس میں سی ایس ایس کے امتحان کوانگریزی کے بجائے ردو میں کرنے کی قرارداد ایوان بالاءمیں پیش کی ، سی ایس ایس امتحان کو اردو میں کرنے کی قرارداد سینیٹر سراج الحق نے پیش کی۔
قرارداد میں کہاگیاکہ اعلی ترین مرکزی ملازمتوں کا امتحان انگریزی کے بجائے اردو میں لیاجائے جبکہ حکومت کی جانب سے قرارداد کی مخالفت کی گئی ۔
وزیر پارلیمانی امور علی محمد خان نے کہا کہ سی ایس ایس میں 45 اختیاری اور 6 لازمی مضامین ہیں، یونیورسٹیوں میں لازمی مضامین انگریزی میں پڑھائی جاتے ہیں، سی ایس ایس کے امتحان میں زبان کا انتخاب اختیاری ہونا چاہیے۔
علی محمد خان کا کہنا تھا ایف پی ایس سی کی رپورٹ کے مطابق 5 فیصد امیدوار لازمی مضامین پاس کرتے ہیں۔
سینیٹر سراج الحق نے کہاکہ آئین ایک مقدس زبان ہے، آئین کے مطابق 15 سال بعد اردو زبان رائج کرناہے، ہمارے بچے 5 زبانیں سیکھتے ہیں، چین، جاپان اور دیگر ترقی یافتہ ممالک نے قومی زبان کی وجہ سے ترقی کی۔
ان کا کہنا تھا ہم آزاد اور خومختار قوم ہیں،اردو زبان ایک سمندر ہے جس میں بہت سی زبانوں کے الفاظ ہیں، اردو زبان میں مقابلے کا امتحان کراکر ہم ترقی کرسکتے ہیں۔
چیئر مین نے کہا کہ قرداد میں اردو کو اختیاری کردیتے ہیں ، جس کے بعد سی ایس ایس امتحان میں انگریزی کے ساتھ اردو کا آپشن کی قرارداد متفقہ طور پر منظور کرلی ، ترمیمی قرارداد کے مطابق سی ایس ایس کا امتحان انگریزی کے ساتھ اردو میں بھی لیا جاسکتاہے۔
دوسری جانب اجلاس کے دور ان سینٹ نے وزیراعظم سکالرشپ پروگرام برائے بلوچستان طلباء میں پانچ سال کی توسیع کی قراداد متفقہ طور پر منظور کرلی ، سینیٹر میر کبیر نے کہاکہ بہت سے طلباءسکالرشپ سے مستفید ہورہے ہیں۔
شیری رحمن ملک کا کہنا تھا اسکالر شپ پروگرام کو پانچ سال کےلئے توسیع کی جائے جبکہ قائد ایوان نے کہا وزیراعظم سکالرشپ پروگرام کو دس توسیع دیناچاہتے ہیں۔
