آٹا بحران پر جماعت اسلامی کے سینیٹر مشتاق احمد خان نے سینیٹ میں روٹی اٹھا کر احتجاج کیا ہے۔

سینیٹ کے اجلاس کےدوران سینیٹر مشتاق احمد روٹی لے آئے۔ انہوں نے کہا کہ کے پی میں جو آٹے کی قیمت ہے پنجاب ،سندھ میں اس سےکم ہے آٹے کی ترسیل پر پابندی لگی ہے، یہ کے پی کیساتھ ظلم ہے۔

سینیٹر مشتاق نے کہا کہ حکمران روٹی کپڑا اور مکان چھین رہے ہیں اس وقت جو حکومت ملک پر راج کر رہی ہے اس نے عوام کو ذخیرہ اندوزوں ، دہشتگردوں کے حوالے کیا ہے حکومت کی رٹ نظر نہیں آ رہی۔

مشتاق احمد خان کا کہنا تھا کہ خیبرپختونخوا میں 86 سالہ شخص کو نگراں وزیراعلیٰ لگا دیا گیا ایسا نگراں وزیراعلیٰ مسلط کیا ہے جو خود کو نہیں سنبھال سکتا۔

انہوں نے کہا کہ اس صوبے میں سیکیورٹی کرائسز، فوڈ اور فنانشل کرائسز ہیں اتنے کرائسز والا صوبہ ایسے نگراں وزیراعلیٰ کےحوالےکر دیا۔