کراچی : ایڈیشنل آئی جی غلام نبی میمن نے سال نو پر ہوائی فائرنگ سے متعلق ایک اور حکم نامہ جاری کردیا، اے آئی جی نےکہا کہ صرف فائرنگ نہیں اسلحے کی نمائش پر بھی کارروائی ہوگی۔
ایڈیشنل انسپکٹر جنرل کراچی غلام نبی میمن نے کہا ہے کہ کراچی پولیس نے ذمہ دار شہریوں سے واٹس ایپ کے ذریعے مدد مانگی ہے، انہوں نے فائرنگ کی اطلاع اور ویڈیو دینےکےلیے واٹس ایپ نمبر 034535142770 جاری کیا ہے۔
غلام نبی میمن نے کہا کہ فائرنگ کی اطلاع سب سے پہلے ون فائیو مددگار کو دی جائے گی، شہری خود کو محفوظ رکھتے ہوئے ایسے عناصر کی ویڈیو بنائی اور کراچی پولیس کے جاری کردہ نمبر پر بھیجیں۔
ایڈیشنل آئی جی کا کہنا تھا کہ قانون کی خلاف ورزی پر فوری گرفتاری اور مقدمہ درج ہوگا، فائرنگ کرنے والا کوئی بھی ہو کارروائی عمل میں لائی جائے گی، جس کےلیے تمام متعلقہ افسران کو حکم پر سختی سے عمل کی ہدایت کی ہے۔
انہوں نے کہا کہ صرف فائرنگ نہیں اسلحے کی نمائش پر بھی کارروائی ہوگی، اسلحے کی نمائش کرنے والے کا اسلحہ ضبط اور لائسنس منسوخ کرائیں گے۔
غلام نبی میمن کا کہنا تھا کہ 31 دسمبر سے واٹس ایپ نمبر پر خصوصی ٹیم موجود ہوگی اور موصول ہونے والے ہر میسج کو ٹیم مانیٹر کرے گی۔
ایڈیشنل آئی جی غلام نبی میمن نے مزید کہا کہ شہری نئے سال کو انجوائے کریں لیکن قانون ہاتھ میں نہ لیں۔
