تہران: ایران اور اسرائیل کے درمیان کشیدگی بالآخر ممکنہ طور پر اپنے اختتام پر پہنچ رہی ہے دونوں ممالک کے درمیان جنگ بندی کا باقاعدہ آغاز ہوگیا ہے۔
13 جون سے جاری ایران اور اسرائیل کشیدگی کے بعد اسرائیل نےگھٹنے ٹیک دیئے اور صدر ٹرمپ سے جنگ بندی معاہدہ کرانےکی اپیل کی ہے، امریکی صدر نے قطری وزیراعظم کو فون کر کے جنگ بندی تجویز پیش کی۔
امریکی صدر ٹرمپ نے قطری وزیراعظم کو اسرائیل کی جانب سے جنگ بندی پر رضا مندی کا بتایا، امریکی صدر نے قطری وزیراعظم کو جنگ بندی پر ایران سے رابطہ کرنےکا کہا جس کے بعد قطری وزیراعظم نے جنگ بندی تجویز پر ایرانی حکام سے رابطہ کیا۔
مزید پڑھیں : اسرائیل اور ایران جنگ بندی پر متفق ہوگئے، صدر ٹرمپ کا دعویٰ
سینیئر ایرانی عہدیدار کا کہنا ہے کہ ایران نے اسرائیل کے ساتھ جنگ بندی کی تجویز کو قبول کرلیا ہے، ایران قطر کی ثالثی میں اسرائیل سے جنگ بندی پر راضی ہوا ہے۔
ایرانی عہدیدار نے کہا کہ ایران قطر کی ثالثی میں اسرائیل کیساتھ امریکی تجویز کردہ جنگ بندی پر رضا مند ہے، خبر ایجنسی کے مطابق قطری وزیراعظم نے فون کرکے ایران کی رضا مندی حاصل کی۔
واضح رہے کہ امریکی صدر ڈونلڈ ٹرمپ نے اپنے سوشل میڈیا اکاؤنٹ پر اعلان کیا تھا کہ اسرائیل اور ایران جنگ بندی پر متفق ہوگئے اور اگلے 6 گھنٹوں میں حملے بند کردیے جائیں گے۔
انہوں نے بتایا کہ تقریباً 6 گھنٹے بعد اسرائیل اور ایران اپنی جاری آخری کارروائیاں مکمل کرلیں گے، یہ جنگ بندی 12 گھنٹوں کیلئے ہوگی اور پھر جنگ کو ختم تصور کیا جائے گا۔
