لاہور: سروسز اسپتال کے درجہ چہارم کے ملازم کو اینٹی کرپشن نے گرفتار کرلیا، ارشد بٹ نے جعلی اسناد و تجربے پر گریڈ 7 میں بطور جونیئر کلرک ترقی حاصل کی۔

اے آر وائی نیوز کے مطابق سروسز اسپتال میں جعلی اسناد و تجربے پر گریڈ 7 میں بطور جونیئر کلرک ترقی حاصل کرنے والے ملازم کو اینٹی کرپشن نے حراست میں لے لیا، ارشد بٹ درجہ چہارم کا ملازم ہے۔

اینٹی کرپشن حکام نے بتایا کہ ارشد بٹ نے آؤٹ ڈور میں زبردستی 2 کمروں پر قبضہ جما رکھا تھا، ارشد غیرقانونی ٹرانسفر پوسٹنگ میں بھی ملوث ہے۔

حکام کا کہنا ہے کہ ملازم نے 44 ڈیلی ویجز ملازمین بھرتی کرا کر لاکھوں روپے رشوت وصول کی، ملازم پر ادویات، فرنیچر، سرجیکل کا سامان چوری کرنے کا بھی الزام ہے۔

ایف آئی آر کے مطابق ارشد بٹ نے ناجائز آمدنی سے جائیدادیں بنا رکھی ہیں، ملزم رشوت لے کر جعلی میڈیکل کرانے کا بھی ماہر ہے۔