The news is by your side.

سلائی مشین میں چھپائے گئے راز نے خاتون کی موت کے بعد خاندان کو مالال کر دیا

برطانیہ میں ایک معمر خاتون کی موت کے بعد جب ان کی چھوڑی ہوئی سلائی مشین کھول کر دیکھی گئی، تو عرصے سے غربت کا مارا خاندان اچانک مالا مال ہو گیا۔

برطانوی خاتون جینیفر ویراسترو کی سلائی مشین نے ان کی موت پر غریب خاندان کی زندگی بدل دی، انھوں نے گھر والوں کو وصیت کی تھی کہ ان کی سلائی مشین ان کے مرنے کے بعد ہی کھولی جائے۔

رپورٹس کے مطابق جینیفر ویراسترو اور ان کے خاندان نے نہایت غربت میں زندگی گزاری، سخت معاشی حالات میں ان کے پاس موجود سلائی مشین ہی ان کا واحد سہارا تھا، جس پر وہ سلائی کر کے کچھ پیسے کما لیتی تھیں۔

جینیفر کا ایک بھتیجا تھا، کارل سباتینو، جو ان سے بہت محبت کرتا تھا، اور ان کا خیال بھی رکھتا تھا، لیکن انھوں نے بھتیجے کو بھی سلائی مشین کا راز نہیں بتایا، اور سب سے یہی کہا کہ ’میں جب مر جاؤں گی تو میری یہ سلائی مشین تمہارے کام آئے گی، اس میں کچھ ایسی چیزیں ہیں جن کو اگر میری موت سے پہلے گھر والوں نے دیکھ لیا تو وہ تکلیف میں رہیں گے، لیکن میرے مرنے کے بعد یہ گھر کو بڑی آفت سے بچائیں گی۔‘

جینیفر کی موت کے وقت بھی پورا گھر مالی مسائل سے گھرا ہوا تھا، یہاں تک کہ ان کی میت اور تابوت کا انتظام کرنے کے لیے بھی پیسے نہ تھے، جینیفر نے آخری سانسیں لیتے وقت اپنے بھتیجے کو قریب بلایا اور کہا کہ تم پریشان نہ ہونا، میری موت کے بعد سلائی مشین کھول کر دیکھنا تمام مسئلے حل ہو جائیں گے۔

ان کی موت کے بعد جب بھتیجے نے سلائی مشین کھول کر دیکھی تو اس میں اخبار میں لپٹی ایک پینٹنگ برآمد ہوئی، معلوم ہوا کہ وہ مشہور مصور پکاسو کی بنائی گئی تھی، جو جینیفر کے شوہر پیرس سے لے کر آئے تھے۔

یہ پینٹنگ اس وقت ملین ڈالرز میں فروخت ہونے والی مہنگی ترین پینٹنگ تھی، جس نے اس غریب خاندان کی ساری مشکلات دور کر دیں۔

Comments

یہ بھی پڑھیں