ٹیسٹ میں پاکستان کرکٹ ٹیم کی قیادت کا بار اٹھانے والے کپتان شان مسعود نے سرفراز احمد کو محمد رضوان پر ترجیح دینے کے حوالے سے گفتگو کی ہے۔
آسٹریلیا کے خلاف پہلے پرتھ ٹیسٹ سے قبل پاکستان ٹیم کا اعلان کردیا گیا ہے، افتتاحی مقابلے کے لیے وکٹ کیپر کے طور پر سابق کپتان سرفراز احمد کو منتخب کیا گیا ہے۔ قومی کپتان نے کہا کہ سرفراز یا رضوان دونوں ٹاپ وکٹ کیپرز ہیں اس لیے ایک کا انتخاب مشکل فیصلہ تھا۔
سیریز کے لیے ٹرافی کی رونمائی کے بعد پریس کانفرس کے دوران شان مسعود کا کہنا تھا کہ اس وقت ٹیم میں جیت حاصل کرنے کا جذبہ ہے، بیٹنگ اور بولنگ میں اس سے بہتر کمبی نیشن نہیں ہوسکتا۔
عثمان خواجہ کے جوتوں پر فلسطین کی حمایت میں لکھے گئے نعرے کے حوالے سے قومی کپتان نے کہا کہ یہ کرکٹ آسٹریلیا کا معاملہ ہے تاہم یہ دیکھنا ہے کہ ہمیں کہاں تک اور کس حدتک اجازت ہے۔
ٹیسٹ میچ جیتنے کے حوالے سے شان نے واضح کیا کہ جیت حاصل کرنے کے لیے پانچوں دن اچھی کرکٹ کھیلنا ہوتی ہے،
انھوں نے کہا کہ کوشش ہوگی کہ بیٹنگ، بولنگ اور فیلڈنگ تینوں شعبوں میں بہترین پرفارمنس کا مظاہرہ کریں، کراچی ہو یا پرتھ کنڈیشنز میں ایڈجسمنٹ کرنے سے پرفارمنس اچھی ہوگی۔
مزید پڑھیں: ٹیسٹ سیریز کے آغاز سے قبل حفیظ اور کرکٹ آسٹریلیا کے سی ای او آمنے سامنے آگئے
ٹیسٹ کپتان نے مزید کہا کہ سرفراز احمد اور محمد رضوان دونوں ہی ٹاپ وکٹ کیپر ہیں، کرکٹر کے پلئینگ الیون میں انتخاب خاصا مشکل فیصلہ تھا، ورلڈ ٹیسٹ چیمپئن شپ میں ہر میچ اور ایک ایک پوائنٹ اہمیت کا حامل ہے۔
